Chief Minister Lalduhoma hovin Mizoram Security Coordination Committee thutkhawm neih a ni

Mizoram sawrkarin ramri kaltlanga dan bawhchhiatna venna kawnga chak zawka hnathawktu ten hma an lakho theihna tura a din, Mizoram Security Coordination Committee te chu nimin khan a tum khatna atan an Chairman leh Chief Minister Lalduhoma hovin an thukhawm.

CM Conference Hall-a thutkhawm ah hian Indo-Myanmar ramri dinhmun te, Indo-Bangladesh ramri dinhmun te, Mizoram leh a thenawm State ramri dinhmun te, ramri paltlanga ruihhlo leh ralthuam tawlhruk chungchang te leh hmalak zel dan tur thil pawimawh te thlirho a ni a. Tripura leh Mizoram ramri, New Kawnpui vela Tripura State Rifles ten Temporary Check Post leh Sentry Shed an rawn siam te chu Chief Secretary leh DGP Level-a inbiak a nih hnuah Tripura Rifles hian an hmunhma te tichhiaa an kalsan thu tarlan a ni.

Heng bakah hian ILP chungchang te, One Nation One Ration Card anga Manipur atanga himna zawnga rawn insawn ten Ration Card an neih ve vekna tur te, International Tourist (khualzin) Mizoram rawn tlawh duh ten permit rang zawk a an neih theih dan tur te pawh an sawi bawk.

He huna tarlan a nih danin Mizoram thubuai ziahluh tam ber chu rukruk thubuai a ni mek a, kumtling lo pawngsual (POCSO Act) bawhchhiatna pawh a tam hle nia tarlan a ni bawk a. ND&PS Act hnuaiah kum 2024 chhung khan thubuai 338 ziahluh niin kuminah hian May thla thlengin thubuai 114 ziahluh a ni tawh a. Methphetamine tablet pawh kumin chhungin May thla thleng khan kg. 648.824 man a ni tawh a, hei hi cheng vbc. 84 man vel nia chhut a ni. Crystal Meth pawh kg 5.169 an man tawh bawk a, cheng vbc. 15.5 man vel nia chhut a ni. Nikum 2024 chhung khan ralthuam leh puakthei kaihhnawih ah thubuai 47 ziahluh niin mi 56 man an ni a. Kumin ah May thla thleng khan thubuai 34 ziahluh ni tawhin mi 51 man an ni tawh bawk.

Nimin-a thutkhawm ah hian Home Minister K. Sapdanga, END Minister Lalnghinglova Hmar, Chief Secretary Khilli Ram Meena, DGP Anil Shukla bakah Mizoram chhunga sawrkar laipui leh State hnuaia venhimna lam thawktu hrang hranga thuneitute an tel a ni.