Mizoram Water Informatics Centre leh Tlawng lui Early Warning System te hawn a ni
World Bank sum hmanga din ‘Mizoram Water Informatics Centre’ chu nimin khan Chief Minister Lalduhoma chuan hawngin Tlawng Lui lian tur griatlawk theihna, Tlawng lui Early Warning System chu a hawng nghal a. He System hi DM&R Department nena enkawl tur a ni.
Irrigation & Water Resources Department Auditorium-a hemi puala inkhawm buatsaih ah Chief Minister Lalduhoma chuan Hmun 82 atanga tui data chi hrang hrang darkar tina min hrilh thei Centre changtlung tak hawn a ni ta chu thil lawmawm leh Scientific lama kan ram hmasawnna chhinchhiahtlak a nih thu a sawi a. National Hydrology Project hnuaia National Water Informatics Centre chuan State zawng zawng mamawh a phuhruk zawh loh avangin State Centre lo neih theih chu Central sawrkar lam duh dan a lo ni bawk nen, he Centre din hi an remtih thu leh sum leh pai hi World Bank lamin an tum a ni tih a sawi a, “Hetiang Centre changtlung kan lo neih tak avangin tui lam Data mamawhtu Department leh Institution ten he Centre hi ring tlang ila, Data thuhmun hmangin hna thawk ila a tha hle ang,” a ti.
Sawrkarin tui hmang tangkai tura ruahmanna a siam tlangpuite pawh Chief Minister chuan tarlangin, Mat Multipurpose Dam siam a nih tur thu te, Vapar ram-a Multipurpose Dam siam theihna tha tak awm chu zirchian mek a nih thu te leh Power siamna lama ruahmanna an neih te a sawi a. Mipuiten ruahtui khawlkhawm uar a tul thu sawiin, “Furah tui kan pump theih loh ni a lo thleng fo a, ruahtui tam tak dawng siin tui kan nghei lek lek thin. Ruahtui dahkhawlna tha hi In tinin neih i tum ang u. Aizawl-ah phei chuan AMC hian ruahtui dawnkhawmna nei lo tur chu Insak hi phal tawh lo mai se a tha lawm ni, tih ngaihtuahna te ka nei rum rum thin,” tiin ruahtui dahkhawlna tha neih a tulzia a sawi bawk.
He hunah hian khual zahawm Irrigation & Water Resources Department changtu Minister PC. Vanlalruata pawhin Water Management lamah hian ruahmanna an nei nual tih sawiin, “Tuihna tihpun dan te pawh hmun hnihah kan enchhin tawh a, a hlawhtling a. Chumi method hmang chuan Tlawng tuihna tihpun kan tum a, Bramaputra Board-ah Project cheng vbc. 70 chuang man kan thehlut a, min pawmsak tawh a ni. Project dang dang pawh kan siam a, IWRD hi Department lian lo tak ni mah ila, kan ram tan hmalakna lian tak neih kan tum mek thung a ni,” tiin Rain Water Harvesting App a tlangzarh nghal bawk.
Nimin a he hun hman ah hian Mizoram State Water Informatics Centre (Mz-SWIC)-a Director Er. K. Hamlet, SE (P&M) chuan he Centre hnathawh dan tlangpui sawifiahin, he Centre hi Mizorama tui kaihhnawih hriat tur pawimawh zawng zawng hriat theihna tura ruahman a ni a. Lui tui luang zat te, ruahtui tla zat te, boruaka tuihu awm zat te, lei hnuaia tui level te leh sik leh sa lam data kan neih theihna turin hna a thawk ang. Hemi atan hian Mizoram hmun 82-ah data lakkhawmna hmun bunfel vek tawh a ni a, Centre-ah hian darkar tin data an thawn thin ang.
Mizoram Water Resources Information System leh Tuilian Warning System pawh he Centre kaltlang hian siam a ni a. Tuilian Warning System hi hmun riat-ah bun niin hengte hi a ri leh hmuh theih chi (audio-visual) pali leh a ri chauh tichhuak thei (audio) hmun li-ah te a ni a. Tlawng-ah hian tui chim chin san zawng hriat theihna hmun ruk- Pukpui leh Mausen inkar, Thenzawl leh Buarpui inkar, Darlung kai, Sihhmui, Buichali leh Bairabi-ah te dahin, heng hmuna Censor an dahte hian ruahtui tla zat, tui awm dan leh a chim chin san zawng an lo chhinchhiah anga, chu chuan hlauhawm lo thleng tur chu lo hmuin tuilian hlauhawm a thlen dawn chuan warning a tichhuak thin dawn niin an sawi.
He hun hi IWRD changtu Secretary Er. Lalrothanga chuan a kaihruai a ni.