Central sawrkarin Tribal te hamthatna a duan kan State pumpui hamthatna a nih thu sawi

Chief Minister Lalduhoma chuan Central sawrkarin Tribal te hamthatna a rawn duan chu kan State pumpui hamthatna a nih thu a sawi.

Tun thla chhunga kalpui tur ‘Aaba Janjativa Gram Utkarsh Abhiyan (DAJGUA) Awareness & Benefit Saturation Camp’ hawnna nimin-a Planning & Programme Implementation Conference Hall-a neih a hmanpuina ah he thu hi sawiin Chief Minister chuan Mizoram mipui zaa 94 aia tam hi Tribal kan ni tih sawiin, “State dangah chuan Tribal te hi hnam tlem zawk an ni hlawm a, keini ramah chuan hnam tam zawk kan ni,” a ti a. Hei vang hian Central sawrkarin Tribal te hamthatna a rawn duan te chu kan State pumpui hamthatna a ni nghal tih sawiin, “State sawrkarin hmasawnna Scheme a duan pawh Tribal hamthatna tur a ni nghal zel,” a ti a. “Kan dinhmun an rawn hriat avangin sawrkar laipui pawhin he Awareness leh Benefit Saturation Camp hi tha taka kalpui a, State dangte entawntlak khawpa tihlawhtling turin min beisei a. Min beisei ang ngeiin a mawhphurtu zawng zawngten tha taka hlen theuh kan tum dawn nia,” tiin a mawhphurtute a chah a ni.

DAJGUA hi sawrkar laipui flagship programme niin kum 2047-a India ram Developed Country-a hlankai tumna kalkawnga Tribal mipuite zirtirna leh an mamawh zualpui pekna tura hmalakna a ni a. Sawrkar laipui chuan a kalpuitu tur Line Department 17 a thlang a, heng Line Department te hian thawkho (convergence)-in India rama Tribal awmna District thlanchhuah 549-ah te hna an thawk anga. Mizoram bikah chuan Line Department 14 ten District 11-a mihring nuai li vel huamin khaw 383-ah kalpui tur a ni.

PM Dharti Aaba Janjatiya Gram Utkarsh Abhiyan (DAJ-GUA) hnuaiah hian sawrkar hnuaia hamthatna hrang hrang:- Aadhaar, Tribe Certificate, Residential Certificate, PM KISAN, NFSA Ration Card, Scholarship, Poshan Abhiyaan, MGNREGA, Ayushman Bharat, PMMVY, TB Mukt Bharat, Nikshay Poshan, Mission Indradhanush, Jan Dhan Yojana, Mudra, Stand-Up India, PM Vishwakarma, Van Dhan Yojana, Kisan Credit Card leh Social Security Ccheme te inzirtirna leh inkawhhmuhna neiin a theih ang ang te tihsak nghal tura ruahman a ni bawk.