Bairabi leh Sairang inkar Rel kawng phah zawh chu a him tawk tih nimin khan puan a ni

Bairabi leh Sairang inkar Rel kawng phah zawh tak chu a him tawk tih nimin khan puan a ni a, ramchhung Rel inthlunzawm zingah Mizoram Rel kawng telh a ni ve dawn ta a ni.

Bairabi leh Sairang inkara Rel kawng phah thar endiktu Commissioner of Railway Safety (CRS) Sumeet Singhal chuan Hortoki leh Sairang inkar Rel kawng phah bik endik hna hi nimin khan zovin km 33.864 a thui-ah hian darkar khat-a kilometre 110-a chakin Sairang atanga Hortoki panin Rel a tlan a, hemi hma hian Bairabi leh Hortoki inkar bik a lo endik tawh a,  mihring leh bungraw phur Rel Mizoram a lut hian State sum leh pai dinhmun mai bakah mihring leh bungraw kal kual vel a ti danglam dawrh dawn nia hriat a ni.

Northeast Frontier Railway (NFR) siam Bairabi–Sairang New Line Rel kawng hi kilometre 51.38 a thui a ni a, Section 4-ah then darh niin, km 16.72-a thui Bairabi to Hortoki te, km 9.71-a thui Hortoki to Kawnpui te, km 12.11-a thui Kawnpui to Mualkhang leh km 12.84-a thui Mualkhang to Sairang te a ni a, Leiverh (Tunnel) 48, Lei (Bridge) lian 55, Lei te 87, Road Over Bridges (ROBs) 5 leh Road Under Bridges (RUBs) 6 a awm bawk a ni.

India ram zalen hnua a vawi khatna atan Aizawl dai, Sairang thleng tura Rel kawng siam hi Sawrkar laipui hmalakna pawimawh, Act East Policy tihhlawhtlinna pakhat niin inkalpawhna tha leh tlawm bakah khualzin hipna leh sum leh pai dinhmun tihhmasawn nana hmarchhak State te thlunzawm chu a tum ber a ni a. Thla hmasa May ni 1, 2025 khan Bairabi to Sairang New Line-ah hian hlawhtling takin Rel tlan tir chhinna, Trial Run neih a lo ni tawh a, tum thum enchhin a nih hnuah nimin khan enchhin tawpna ber, Final Trial neih leh a ni a, Commissioner of Railway Safety (CRS) Sumeet Singhal chuan endikna hi a zawhfel hunah leh a him tawk a ni tih finfiahna tul dangte a buaipui zawh hnu, tun thla June ni 17 hnu lamah Rel kawng hi hawn theih beisei a ni.

Akashvani News-in Sairanga cheng mi thenkhat a kawm kual chuan rel lo lut tur chu lawmawm an tih thu an sawi a, tunah pawh rel kawng leh Station-ah inhlawhfakna tur te an neih phah tawh a, Rel a lo luh hunah phei chuan chawhmeh a tlawm tawh dawn nia an hriat avangin an phur hle tih an sawi a.  Sairang Branch YMA President Pu Vanlalmuana chuan rel lo lut tur chu Sairang mipuite an lawm hle tih sawiin, Area MUP President B. Lalrinthanga pawhin Rel lo lut chu thil tha tak leh ram hmawsawnna turah an ngaih thu a sawi a ni.