Zuangtui-a Mizoram PWD Hot Mix Plant tichhia

Nizan hmasa (May 9, 2025) khan Mizoram PWD Hot Mix Plant, Zuangtui a mi chu a control-na mipuiin an tichhia nia hriat a ni a, hemi changchang ah hian PWD leh Sky Builders, Nidhi chuan nimin khan Bawngkawn Police Station-ah FIR an thehlut a ni.

Thulakna in a tarlan danin Zuangtui-a PWD Hot Mix Plant dahna chhak leh thlang ah hian chenna In a awm ve ve a, hna an thawh lai chuan thil khu dum a chhuak nasa thei hle a. Helai vela chengte chu an hrisel loh phahin, an thlai te pawh a tha thei lo a. An tukverh leh kawngkharte pawh an hawng ngam ngai lo a ni. Hetiang a nih avang hian Zuangtui Veng khawtlang chuan thuneitute hnenah pawh an thlen thin a, mahse dah sawn a ni chuang lo a. Zuangtui khawtlang hruaitute hlauh ruk ang ngeiin thil a thleng ta a ni.

Thudawn danin, Hot Mix Plant tak hi chu thir chhah pui pui a nih avangin tihchhiat a harsa a, a bula a Control-na hmun chu hal chhiat a ni a, thildang thenkhat pawh a chhia a. Hei vang hian tun dinhmunah helai hmuna Hot Mix Plant hi hman theih a ni lo a. Tunlaia Aizawl kawng siamna atan he Hot Mix Plant hi hman ber a nih avangin kawng siam chhunzawm theih a ni dawn em tih hriat a la ni lo bawk.

Hemi chungchanga PWD leh Sky Builders, Nidhi-te'n FIR an thehluh ah chuan he thil thleng ah hian Hot Mix Plant Control Cabin Unit, Air Conditioner (1 ton), Hote Mix Plant Mixing Drum, Hot Mix Plant Wiring zawng zawng, Mixing Drum Motor, Cilinger Motor, Vibrating Motor Feeder Motor, Filler Motor, Hot Mix Plant Jection Box leh an bungrua engemaw zat a chhiat thu tarlan a ni.