Tlawng lui nut chhan chungchang PHE Minister hovin tlawmngai pawl aiawhte nen sawiho a ni

Nimin khan Public Health Engineering (PHE) Department changtu Minister Prof. Lalnilawma hovin tunhnaia Tlawng lui nu vak chungchang sawiho a ni.

Conference Hall No 2, MINECO-a he sawihona hunah hian PHE Department, Disaster Management & Rehabilitation Department, Aizawl Municipal Corporation aiawhte leh tlawmngai pawl 3 – Central YMA, Centre for Environment & Social Justice (CE&SJ) leh Save The Riparians hruaitute an tel a, PHE Minister Prof. Lalnilawma chuan Tlawng lui chu Aizawl khawpui tui tlan ber anih avangin mi zawng zawngin kan veitlan a tul thu leh a humhalhna kawngah Sawrkar Department hrang hrang leh tlawmngai pawl hrang hrangte tan tanho a mipuite zirtir chu thil tul tak a nih thu a sawi a. Tunhnaia tui awm reng si, mahse tui a nut zual avangin pump theih loh a awm zeuh zeuh tih sawiin, hengte hi a chhan hriat a, hmalak ngai te chu sawiho tha an tih avanga he thutkhawm hi koh a nih thu a sawi bawk.

PHE Department in he thutkhawma tarlan danin April thla leh May thla (nimin thlengin) ni 4 ve ve chhung tui a nut avangin tui an pump tam thei lova. Tui nut dan tehna, Nephelometric Turbidity Unit, NTU tia sawi ah 5NTU aia sanglo chu tui intlak a ngaih a ni a, tui a nut lain NTU hi 900 – 1400 inkar te ni thin a, hemi vangin tui tih thianghlim chu hna hautak leh khawl ten a tawrh theih avangin tui pump theih zat nasa takin heng hunlaia a tlakhniam thin thu te an tarlang a ni.

Central YMA, Centre for Environment & Social Justice (CE&SJ) leh Save The Riparians hruaitute chuan Tlawng lui nut chhan nia an hriat te leh hmalak dan tur zau takin he hunah hian an sawi. AMC lam pawhin leivung paih chungchanga ruahmanna an siamte an sawi lang bawk a. Aizawl khawpui tui tlan ber anih angin Tlawng lui humhalh chu mut mawh hnar mawha neih a tul thu te uar taka sawilan a ni a, rawtna hrang hrang siam a ni bawk.

Tlawng lui nut chhan chungchanga ah hian Department mal anga hmalak mai a theih lova, Department hrang hrang te nen tanho a hmalak a ngaih thu te, hemi chungchang zau zawka sawiho leh hma lak anih theih nan Chief Minister kaihhruaina hnuaiah High Level Committee din nise tih te, leivung/bawlhhlawh paih chungchanga tun aia tha zawk inkaihruaina leh dan mumal zawk te siam nise tih te, Tlawng lui dung enkawl leh tuihna te humhalh nan hemi atana a hranpa a Master Plan duan a tul zia te, dan lova leivung paih thin chunga hremna khauh lekkawh a tul thu te leh The Mizoram (Protection of Rivers) Act 2023 chu a taka hman a tul zia te chu rawtna leh thil sawiho zingah a tel a ni,