Thenzawl khua ah Mizoram-a CMTC hmasa ber Chief Minister in nimin khan a hawng
MzSRLM hnuaia din leh Mizoram-a CMTC hmasa ber, Vantawng CLF Community Managed Training Centre hawnna hun nimin-a Thenzawl a neih ah hian Chief Minister Lalduhoma chuan Mizoram-a Community Managed Training Centre hmasa ber, Vantawng CMTC hawn theih a ni ta chu lawmawm a tih thu sawiin, “Ka bial chhunga bul min tansak avangin kan Minister Prof. Lalnilawma leh MzSRLM thuneitute chungah lawmthu ka sawi a ni,” a ti a. Chief Minister Bial a nih vanga duhsak satliah erawh an ni lo nia a hriat thu sawiin, “Kan SHG ho nen hian ka Office lamah pawh kan lo inhmu tawh a, an thil siamchhuah te min rawn hmuhtir hlawm a. Duhsak tlakin hna an thawk niin ka lo hre ve a ni,” a ti. Chief Minister chuan Mizote hi kan pi leh pute atanga lal rorelna hnuaia mawi taka lo nung za thin, thil tiho thiam, khawtlang pawimawh tinreng hnatlanga thawk dial dial thin kan ni tih sawiin, “He kan thawhho thiamna, pi leh pute atanga kan chhawm, kan thisena bet tlat tawh hi kan eizawnna kawngah kan hman thiam chuan kan hlawkpui ngei ngei dawn a. Livelihood Missions pawh hian chu chu a rawn tinzawn a ni,” a ti a. Self Help Group zawng zawngte chu taima tak leh hlawhtlin ngei tuma lo bei thin tura chahin, “Kan ram economy ah danglamna nasa tak in thlen thei a ni,” a ti a. CMTC chu mi tam takten eizawnna khawp thiamna an chharna hmun, SHG member te intuaihriamna hmun leh midangte tan pawha chhawr theih Centre a nih ngei a beisei thu sawiin, “Vantawng Cluster Level Federation hnuaia Self Help Group zawng zawng te ka lawmpui a ni,” a ti a. Kan ram tharchhuah behchhan zela hmalakna kalpui thin turin a chah bawk.
Vantawng CLF Community Managed Training Centre hawnna hun hi MzSRLM-a CEO Zosangzuali Pachuau chuan kaihruaiin Serchhip DRDO Project Director leh District Missions Director Dr. Malsawmtluanga Fanchun chuan Technical Report pein Ministry of Rural Development kaihhruaina siam angin, CMTC-ah hian mi 30 atanga 60 leng Training Hall, a tlem berah mi 10 tal riah theihna Dormitory/Room, Ei leh in buatsaih theihna choka/kitchen leh SHG member ten a tul anga an dawr tur CLF Office te a awm tur a ni a. Nimin a hawn tak Vantawng CLF CMTC hi Mizoram-a a hmasa ber niin, kum hnih chhungin Mizoram District tinah din hman an tum a. Vantawng CLF hnuaiah hian Bungtlang, Keitum, Hriangtlang, Thenzawl, Zote South, Buangpui, Neihloh leh Kanghmun South khua te an awm a ni.
Nimin-a he hun hman ah hian RD Minister Prof. Lalnilawma chuan he Centre hi pawl enkawl (community managed) tura din a nih thu leh amah leh amah a inenkawl thei tura ngaih a ni tih a sawi a. SHG kaltlang hian hmachhawp lian tak tak an neih thu sawiin, “Kan ram product te hi Brand pakhat hnuaia kalpui kan tum mek a. Nu, kum khata cheng nuai khat lalut phak lo te puala hmalakna te pawh kan kalpui dawn a ni. Heng kan hmalakna tinrengte hi khawtlang leh ram tan a ni tih hriain theihtawp in lo chhuah zel dawn nia,” tiin a chah bawk.
Ani bakah hian AH&Vety Minister C. Lalsawivunga pawhin Thenzawl leh a chhehvel khuaa miten MzSRLM hmalakna hlawhtling taka an lo kalpui chu hmuhnawm a tih thu sawiin, an hmalakna chu ram tan a ni tih hrerengin taima tak leh rinawm taka lo thawk zel turin a chah a. MzSRLM-a State Mission Director R. Zarzosanga leh Vantawng CLF-a President Ramthianghlimi te pawhin he hunah hian thu an sawi a ni.