Kumin January thla a bo nia rin ruang hmuh a ni

Kumin January 5 atanga chin hriatloha awm Christopher Lal-ruatfela ruang nia ngeia rin chu nimin khan Vaivakawn Zohnuai-a leimin ah laihchhuah a ni.

Thudawn danin nimin khan Vaivakawn Zohnuai-a leimin ah Bike pakhat chu laihchuah a ni a, he Bike hi Christopher Lalruatfela Bike ni ngeia hriat niin enfiah a nih hnuah a Bike a ni ngei tih finfiah zui a ni a, hei vang hian Bike hmuhna vel hi zawn leh niin nimin tlai dar 3:50 vel khan amah ni ngeia hriat ruang pakhat chu Bike an hmuhna kham bul, Bike atanga hla lutuk lo ah hmuh leh a ni a, ruang hi lakchhuah Christopher Lalruatfela ruang ngei a ni tih a thawmhnaw atangin finfiah a ni.

Dawrpui Vengthar-a cheng Christopher Lalruatfela S/o Hming-thanmawia (L) hi kumin January 5 khan an In atanga a chhuak chu chin hriat loh in a awm zui a, hun engemaw chen zawn a nih hnuah March 17, 2025 atang khan khawtlang huapa zawn a ni a, engmah a chin hriat zui a nih loh avangin Mizo dan-a ni 7 an zawn hnuah March 23, 2025 khan Rangvamual-a Truck Terminal-ah a zawnna hun hi tihtawp leh a ni a, nimin khan a ruang hi hmuh a ni ta a ni.