Sports Minister in hawng

Sports Minister Lalnghinglova Hmar chuan Mizoram Badminton Centre, Zuangtui-ah Regional Competitive Training Centre (RCTC) leh MBC Grassroot Centre te chu niminpiah khan a hawng.

TATA Trusts, NEIDA, Pullela Gopichand Badminton Academy (PGBA), Mizoram State Sports Council (MSSC) leh Mizoram Badminton Association-te thawhhona atanga din, Regional Competitive Training Centre (RCTC) leh MBC Grassroot Centre hawnna ah hian Minister chuan Badminton-ah India a san avangin India rama lang phak nih chu khawvel a lang phak nihna a ni tih a sawi a. Kum 2036-a India in Olympics thlen a tum ah pawh Mizoram infiammi te an tel ve ngei theih nana hmalak tan anih thu leh Mizoram atanga badminton player-te that dan en in, olympic-a an lan theih a hnai riau nia an hriat thu a sawi bawk.

Report atanga a lan danin tun dinhmun ah TATA Trusts, NEIDA, PGBA, MSSC leh MBA-te thawhhona hnuaiah hian Mizoram hmun hrang hrangah Grassroot Centre 24 a awm mek a, chung ah chuan naupang 1047 an inziak lut a. Kolasib leh Champhai-ah Elite Centre din a niin hengah hian Badminton training lai mi 27 an awm bawk a, RCTC, Zuangtui-ah mi 20 awm mekin, PGBA-ah mi 9, TATA Trusts lam in an sponsor mek bawk a ni.