International Year of Cooperatives Walkathon nei

International Year of Cooperatives (IYC)-2025 lawmna chi khat atan nimin zing khan Aizawl-ah ‘IYC-2025 Walkatho’ neih a ni a, kumin chhung hian RCS, Mizoram hmalakna in IYC-2025 activity hrang hrang kumtluan in neih tura ruahman a ni.

Registrar of Cooperative Societies (RCS), Mizoram huaihawta ‘IYC-2025 Walkathon’ ah hian Cooperation Department hnuaia Officer leh thawktu dangte bakah State Level Cooperative Federation/Union hrang hranga thawktu mi 100 chuang an tel a, Aizawl Vanapa Hall kawt-ah Registrar of Cooperative Societies John L.T. Sanga kaihhruaiin bul tan a ni a, IYC-2025 puala T-shirt siam, Mizoram Cooperative Apex Bank (MCAB) Ltd-in an sponsor chu he hun tel zawng zawngte hnenah sem a ni. International Year of Cooperatives chungchang sawi a nih hnuah MCAB Chairman Lalnunsanga chuan ‘IYC-2025 Walkathon’ hi a vailiam (flag-off) a, Millennium Centre thleng an kal a ni.

Millennium Centre tual zawl-ah hian a kharna hun hman chhunzawm niin he hunah hian Cooeration Department changtu Secretary Amit Sharma IAS chuan thu sawiin State lian lo, Mizoram angah hian Cooperative Sector kaltlanga hmasawnna kalpui a remchan thu a sawi a, kalkhawmte chu IYC-2025 kumah hian Cooperative Sector kaltlanga kan ramah hmasawnna a awm ngei theih nana theihtawp chhuah turin a sawm a ni.

United Nations (UN) chuan kum 2025 hi International Year of Cooperatives-ah puangin thupui atan ‘Cooperatives Build a Better World’ tih chu thlan a ni a. IYC-2025 pual hian activity hrang hrang ruahman niin Mizoram-ah pawh Sensitization Programme, Swachhta me sahakar (cleanliness drive) leh Programme dangte buatsaih a ni tawh a, IYC-2025 hriatrengna lungphun (monument) RCS Office, Zarkawt a mi pawh Cooperation Minister PC. Vanlalruata chuan April 8, 2025 khan a hawng tawh bawk a ni.