Featured post
RIPANS chu India Hmarchhak-a Nursing zirna changtlung ber a nih thu Health Minister in a sawi
Health Minister Lalrinpuii chuan RIPANS chu India Hmarchhak-a Nursing zirna changtlung ber a nih thu leh Nurse te chu mipui te hriselna enkawlna kawnga pawimawh ber an nih thu a sawi.
Regional Institute of Paramedical and Nursing Sciences (RIPANS)-a Final Year M.Sc (Nursing) zirlaiten Nurse te intuaitharna leh than zelna atana duan, Continuing Nursing Education program hawnna inkhawm nimin-a an buatsaih a hmanpuina ah Health Minister Lalrinpuii chuan Nurse te chu mipuite hriselna kawnga dinhmun pawimawh tak chelhtu an ni tih inhre reng turin a chah a. Sawrkar pawhin mipuite hriselna chu a ngaipawimawhin, Mizoram Universal Healthcare-te pawh mi tin huapzo turin a kalpui tan mek tawh tih a sawi a. Heng te hre reng chung hian Nurse-te pawh mipuite tana rawngbawltu an nihna chu vawngnung zel turin a chah nghal bawk a ni.Ni hnih awh tur he programme-ah hian ‘Investing in Nurses, Investing in Health: Empowering the future of healthcare’ tih chu thupui-ah hman niin Nursing zirna In leh Damdawi In hrang hrang atangin Nursing Zirtirtu, Senior Nursing Officers leh Nursing Officers 30 ten ni hnih chhung training an nei dawn a. Topic hrang hrang zirtirna nei turin mithiam bik panga te sawm an ni.
RIPANS hi Ministry of Health & Family Welfare, Govt of India hnuaiah kum 1996-ah din a ni a, North East State hrang hrang atangin zirlai 800 chuang awmin, Bachelors programme 5 a awm a, Master programme 3 leh PhD zirna programme pakhat a awm mek a. Hei bakah hian Physiotherapy leh Nutrition & Dietetics programme hawn belh tura hmalak mek a ni a. Khum 100 awmna damdawi In hawn thuai tum a ni bawk.