Entry/Exit Point siamna tur hmun 13 thlan a ni

Nimin khan Saitual-ah Border Coordination Committee chu an Chairman leh Bawrhsap Dr. Lalngura Tlau hovin an thukhawm a, he thutkhawm ah hian Bawrhsap chuan Home Department atanga ngenna angin Indo-Myanmar Border-a luh leh chhuahna (entry/exit), hungna (fencing) leh hnathawh ngai hrang hrang endik a, a tul anga hma la turin Border Coordination Committee chu din a ni tih a sawi a ni. Indo-Myanmar border-a Entry/Exit point siamna tur atan hmun 13 thlanchhuah a ni a, chumi zingah chuan Hrianghmun-Tuisa lui, Saitual District chu a tel a. Border Coordination Sub-Committee Chairman, SDO (C), AR aiawh leh BRO aiawhte chuan Hrianghmun-Tuisa lui chu Joint survery neiin, a hungna tur hmun te, Entry/Exit Point siamna tur te, Check Post siamna tur ram te an endik ang. Joint Survey report hi Border Coordination Committee-ah thehlutin Home Department lamah thehluh leh tur a ni ang.