MZP in HSSLC Exam 2025-a Mizo zirlai tithate hnenah chawimawina an hlan

Mizo Zirlai Pawl (MZP) General Hqrs. chuan Higher Secondary School Leaving Certificate (HSSLC) Examination 2025 result chhuaka Top 3-a tling Mizo zirlaite hnenah nimin khan chawimawina an hlan.

HSSLC Examination 2025 result chhuaka Arts,Science leh Commerce Stream-a Top 3-a lang zirlaite chawimawina hun Vaivakawn Cultural Centre-a neih hi Agriculture Minister PC. Vanlalruata chuan khuallian nia hmanpuiin Zirna (Education) chu puitling a min siamtu a nih thu leh zirna chuan kan nunkawng zawh ah min hruaiin dinhmun tha a min din tir theitu a ni tih a sawi a. Zirlaite fuihna thu sawiin, “Vawiin a kan chawimawite hi an insum theihna avanga hetiang dinhmun hi thleng thei an ni a, Ruihhlo a ni emaw, Social Media lam a ni emaw, eng kawngah pawh insum theihna kan neih a ngai a ni,” a ti a. Kan ram leh hnam kal zel tur hi tuna thalaite leh zirlaite kutah hian a awm tih sawiin, kan ramah ruihhlo in a nasa taka bu a khuar tawh thu a sawi a, ruihhlo laka fihlim tum tlat turin zirlai kalkhawmte chu a chah bawk a ni.

Nimin-a MZP in Zirlai tithate an chawimawina hun hi an pawl Vice President Dr. C. Lalremruata chuan kaihruaiin HSSLC Exam 2025-a Arts, Science leh Commerce Stream Top 3-a Mizo tling mi 8 te hnenah chawimawina thuziak leh pawisafai Rs. 5000/- theuh an hlan a, heng bakah hian 'Mizoram GK Mini Edition' leh 'Duhthusam Ram’ tih Lehkhabu te an hlan tel bawk a. Chaiwmawina an hlan te hi Arts Stream-ah pakhatna Lalrammawii Tochhawng; pahnihna Zorinmawii leh pathumna Daniel Lalruatsanga te an ni a. Science Stream-ah pahnihna T. Lalmuanpuia leh pathumna H. Malsawmdawngzuala te niin Commerce Stream-ah pakhatna Kristin Laldinpuii Ralte; pahnihna Lalhruaikima leh pathumna Esther VL Roluahpuii te an ni.

He hunah hian MZP General Hqrs. President H. Lalthianghlima chuan Mizo zirlai ten an zirna kawngah theihtawp an chhuaha Top 10 emaw Top 3-ah emaw Mizo zirlai a tam thei ang ber an lan zel theihna tur leh chona siamtu anih zel theihna turin hetiang hun hi an buatsaih thin thu a sawi a. UPSC Exam-a inziaktling kan awmlohna a rei ta hle tih pawh sawiin, “Sum thianghlim lo lakah fimkhur ila, sum thianghlim lo a hausa te'n thalaite ruihhlo ngawl min vei tir a, heng hi khawtlang leh zirlai anga kan do zel a ngai,” tiin zirlaite chu a fuih bawk.