India rama Sawrkar damdawi In tha tehnaah Mizoram-a sawrkar damdawi In 5 an tling thar

India rama sawrkar damdawi In tha bik tehna ah Mizoram a damdawi In panga – State Referral Hospital, Falkawn bakah Chhipphir PHC, Phuldungsei PHC, West Phaileng PHC leh Bilkhawthlir PHC te chu an tling thar.

National Health Mission-a Mission Director Dr. Lily Chhakchhuak sawi danin India rama sawrkar damdawi In tha bik tehna, National Quality Assurance Standards (NQAS)-ah hian State Referral Hospital, Falkawn (Aizawl West District Hospital/ZMC&H) chu an tling thar a, a tehnaah 92.89% an hmu a ni. Hospital pumpui anga NQAS Certification an hmuh bakah hian nau neihna hmun tha bik tehna, LaQshya-ah Platinum Certificate hmuin Maternity OT bikah 98.26% an hmuh bakah Labour Room-ah 92.88% an hmu a, naupang enkawlna hmun tha bik tehna, MusQan Certificate pawh hmu telin 92.80% lai an hmu phak bawk a ni.

Aizawl West District Hospital bakah hian Mizoram-a Primary Health Centre (PHC) pali te chuan NQAS Certificate hi an hmu thar bawk a, heng te hi Chhipphir PHC (92.48%), Phuldungsei PHC (91.27%), West Phaileng PHC (89.47%) leh Bilkhawthlir PHC (94.94%) te an ni a. Heti hian Mizoram chhunga Sawrkar damdawi In 19 te chu NQAS National Certificate nei tawh an ni a. Tunah hian sawrkar damdawi In 24 dangin State Level Certificate nei tawhin National Certificate hi an dil mek bawk a ni. 

Health Minister, Lalrinpuii chuan, India rama damdawi In tha bik thlanchhuah zingah Mizoram-a damdawi In an awm belh zel chu Mizoram tan mellung pawimawh tak a nih thu leh damdawi In, District leh State-a thawktu zawng zawngte thawhrimna leh taimakna chhuanawm a tih thu a sawi a, heng tehna te hi Sawrkar damdawi In pantu damlote chu a chhawr tangkai bertu tur an nih thu a sawi bawk.