HSLC leh HSSLC exam a Science leh Mathematics a titha hnenah ‘STAM Proficiency Award sem’ a ni

Science Teachers' Association, Mizoram (STAM) buatsaihin kumin-a MBSE in HSLC leh HSSLC Exam a buatsaiha Science leh Mathematics Subject a mark hmu sang ber (Topper) te hnenah Inrinni khan 'STAM Proficiency Award' hlan an ni.

Zarkawt Community Hall-a he hun hman hi MBSE Chairman JH. Zoramthanga chuan khuallian nia hmanpuiin zirlai titha te lawmpuiin duhsakna a hlan a, chawimawina an dawn theihna tura sumfai thawhtu te hnenah lawmthu sawi bawkin, he huna chawimawina dawngtute chu chawimawina an dawn hi bul tanna chauh anih thu leh zirna In tha a lut thei tura inbuatsaih turin a fuih a, Mizoram in kan mamawh thiamna pawchhuak turin a chah bakah Khawvel huap-a zirna In tha a lut tura tan la turin a chah a. He huna kalkhawm zirlaite chu thinlung zawng zawnga Pathian hmangaih tlat tura fuihin, MBSE in Science leh Mathematics zirlai Bilingual (English leh Mizo tawng) a siam chu zirlai ten an tangkaipui thu a sawi a, kum hmasa lam aiin Science subject pass an tam zawk thu a tarlang bawk.

Kum 2017 atang khan Science zirna in hma a sawn theihnan zirlai titha te chawimawina hi STAM in a buatsaih thin a, sumfai tumsaktu atan Science zirna a tui mi leh mi hlawhtling, mi hmingtha sawm an ni a. Award hian pawisafai Rs. 10,000/-, Memento, Certificate leh STAM Dictionary a keng a ni. Kumin hian HSLC Result chhuak atangin C. Lalvenzuala S/o C. Laltlanzova, St. Pauls Higher Secondary School, Aizawl chuan STAM - Prof. Rualkhuma Colney Science Award a dawng a. Lalrohlupuii D/o Vanlalrema, Little Kingdom School, Aizawl chuan STAM - Dr. H. Lalthlangliana Mathematics Award a dawng bawk.

Pawl 12 zirlaite atanga HSSLC Exam result chhuak ah Emmanuel Lalmuanawma S/o Zirthanga Pachuau, St. Paul's Higher Secondary School, Aizawl chuan STAM - Er. Zoram Thanga (USA) Mathematics Award dawngin Cynthia Lalhlupuii Shangpliang, St. Paul's Higher Secondary School chuan Subject pathum-ah Award a dawng a, heng te hi STAM - Er. Lalchungnunga ( USA) - Physics Award; STAM - Er. Zoram Thanga(USA)- Chemistry Award leh STAM - ZET- Biology Award te a ni.

He hunah hian pawl 9 leh 10 zirlaite tan Science Article inziahsiak lawmman sem a ni bawk a, LH Laltleipuii, Holy Faith School, Lunglei chuan lawmman pakhatna dawngin Mercy Lalawmpuii, Synod Higher Secondary School, Aizawl in pahnihna leh Lalhmingsangi Hnamte, St. Paul's Higher Secondary School in pathumna te an dawng a. He hunah hian STAM Adviser Prof. Rualkhuma Colney chuan thu a sawi bawk a ni.