Ramri-ah ngawrh lehzualin inzarpharh mek

Ramri boruak tiralmuang lo thei thil duhawm lo thleng palh thei vengin tunlai hian BSF sipaite chu Mizoram leh Bangladesh ramri-ah ngawrh lehzualin an inzarpharh mek.

Tunhnaia India leh a thenawm ram Bangladesh inkara boruak danglam tia sawi theih inmung mek avangin Tlabung chhehvel ah ramri vengtu sipai - Border Security Force (BSF)-ten khauh lehzualin ramri venhim hna an kalpui mek a, boruak danglam deuhin ram pahnih inkar a tuam mek avang hian BSF Battalion-a Subordinate Officer mai bakah an aia hotu lian zawk Gazetted Officer ten ngawrh takin ramri hrula Border Outpost hrang hrang an thutchilh mek a ni. Hetihlai hian ramri-a sipai awmsa te bak a dang tirhluh belh an la ni rih lo tih Mizorama BSF hotute chuan sawiin, Border Outpost hrang hrang erawh tum dang zawng aia Officer-ten an thutchilh ngun zawk thu an sawi a, tun dinhmunah ramri-ah thil duhawm lo thleng sawi tur leh chutiang thlen thei boruak duhawm lo inmung a awm rih lo nia an hriat thu an sawi bawk. 

Ramri-a veivah pawh tun dinhmunah chuan mumal taka khuahkhirh a la nih rih loh thu leh ram pahnih inrina hrula veivakte pawhin hetiang avanga harsatna an tawh rih loh thu thudawnna chuan a sawi a, hetihlai hian fimkhur thuhla ah ramri-a veivak turte chu India khua leh tui an nihna nemnghet thei tur document pawimawh ken theihnghilh lo turin uar takin an inchah thung a ni.