Chhiahtlang HSS in HSSLC pass thar te lawmpui

Zonuna Kawlni /

Chhiahtlang Higher Secondary School chuan kumin-a Higher Secondary School Leaving Certificate (HSSLC) Exam-a an School atanga pass te lawmpuina hun nimin khan hmangin he hun hi Bialtu MLA leh Minister PC. Vanlalruata chuan a hmanpui a ni.
 MBSE in kumin-a HSSLC Exam a buatsaih result a tihchhuah takah khan Chhiah-tlang Higher Secondary School atang hian zirlai 26 in exam hmachhawnin an vai hian hlawhtlinna changin 100% an pass a. Distinction-ah zirlai pakhat pass in First Division-ah zirlai pakhat, Second Division-ah zirlai 9, Third Division-ah zirlai 15 an pass a ni.


Heng zirlai pass thar te lawmpuina hunah hian Bialtu MLA leh Minister PC. Vanlalruata chuan zirna chu mi puitlinga min siamtu, khaw eng min hmuh tirtu a ni tih sawiin, Chhiahtlang Higher Secondary School zirlai ten hlawhtlinna ropui tak changa, zirlai za-ah za an pass thei chu Zirtirtu, Zirlai te, nu leh pa te leh khawtlang mipui thahnem-ngaihna vang a ni, a ti a. He School changtlun zelna turah Managing Board te leh Zirtirtute an tang em em tih sawiin, Bialtu MLA a nih ang pawhin tihtur tam tak a neih thu leh Managing Board te nena thawhhona tha an neih zel a beisei thu a sawi a. Zirlai hlawhtlinna chang thar te duhsakna hlanin, Exam hmachhawn leh tur te pawh theihtawp chhuah turin a fuih a ni.

Chhiahtlang Higher Secondary School atanga zirlai pass thar te lawmpuina hun hi School Managing Board Treasurer RC. Lalhruaitluanga chuan kaihruaiin School Principal Lalawmpuii Ralte leh Managing Board Chairman H. Lal-rawngbawla te chuan report an pe a. Zirlai pass thar te hi lawmpuina thilpek an hlan bawk a ni.

Chhiahtlang Higher Secondary School hi kum 2014-ah din niin an School atang hian pawl 12 zirlai ten Board Exam vawi 11 an hma-chhawn tawhah vawi 9 chu zirlai Exam zawng zawng an pass vek a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »

Serchhip-a Damdawi In helna kawng siam tum a ni

Zonuna Kawlni /
Image
District Hospital Serchhip paltlangtu Vantlang kawng chungchang chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni a. He thutkhawm ah hian PWD Ser-chhip Division-a Executive Engineer-in kawng siam dan tur ruahmanna (plan) leh a lem (map) te a tarlang a. Hemi hnu hian sawihona neiin District Hospital Serchhip paltlangtu kawngpui thlakna tur kawngpui siam tum tawh chu Hospital tana harsatna siam lo leh ram la hek lutuk lo zawnga siam chu thil tul leh tha nia pawmtlan a ni a. He thutkhawm neih zawh hnu hian kawng siamna tur hmun hi tlawhin kawng lak tur chinte enfiah nghal a ni bawk.
Kimchang zawkin »