Serchhip District-a mipui aiawha thlan hmeichhia te Dan leh an hriat tur pawimawh te zirtir an ni

Mizoram State Legal Services Authority leh All Mizoram Elected Women Representative te tangkawp buatsaihin nimin, May 16, 2025 khan Serchhip District chhunga Elected Women Representative te tan ‘Special Campaign on Scheme of National Legal Services Authority (NALSA) & Capacity Building & Leadership Training’ neih a ni.

New Serchhip YMA Hall-a he hun hman hi Serchhip District Bawrhsap Paul L. Khuma chuan khuallian nia hmanpuiin hmanlai hun kan thlir chuan raldo thin leh ramchhuak thin kan nih avangin mipa te pawimawhna a sangin, In lam leh khawtlang rorelna ah pawh hmeichhia te an lang thei mang thin lo tih a sawi a. Amaherawh chu tunah chuan khatiang hun kha liam tawhin, kan hmasawnna leh changkanna avangin a thluak tha, thil hrethiam leh man thiam te tan dinchhuahna kawng a inhawng zau a, Hmeichhia te tan pawh dinhmun sang tak tak chelh theihna kawng zau tak a inhawng tawh tih a sawi a. Chutihrual chuan khawtlang hruaitu leh roreltu atana thlantlin te chu kan mawhphurhna hlenchhuak tura keimahni kan inbuatsaih thar ve a tul thu leh hmasawn an tum a tul thu a sawi a ni.

Bawrhsap chuan he huna kalkhawm mipui ten an aiawh tura an thlan khawtlang hruaitute chu Kristian an nih anga Isua Krista entawna hmangaihna leh khawngaihna nen khawtlang leh mipuite tana hna thawk turin a chah a. An hnathawhna leh khawtlang rawngbawlna kawnga hma an lakna beidawng mai lova a hlawhtlin hma chuan theihtawp chhuaha bei thin turin a chah a. Chumi atan chuan he huna an thil zir hrang hrangte chu tangkai taka an hman theihna turin an thil zir te uluk taka ngaithla tur leh hlawk taka he hun hi hmang tura a duhsak thu a sawi bawk a ni.

Nimin-a he hun hman hi R. Zomuanpuii, President All Mizoram Elected Women Representatives chuan kaihruaiin inlawmna thu an sawi a. An pawl chu Mizoram pum-a mipui aiawha thlantlin hmeichhia te pawl a ni tih sawiin, nimin-a Programme an buatsaih ang hi Mizoram hmun hrang hrangah buatsaih an tum thu a sawi a. Serchhip hi Aizawl pawn lama hun an buatsaih hmasak ber a nih thu a sawi a. Ani bakah hian Josangzeli Tlau MJS, Civil Judge-cum-Judicial Magistrate First Class, Serchhip pawhin thu a sawi bawk.

Chawhnu lamah Technical Session hun hmangin Dr. David Lalawmpuia, Advocate; Lalvensanga, District Mission Coordinator, Hub for Empowerment of Women; Inspr. R. Lalbiakhlua, OC Serchhip Police Station leh Vanlalhruaia Ralte, Head Faculty, DPRC Serchhip ten Hmeichhia te tana Dan hriat tur pawimawh te, Dan leh thupek kenkawh kawnga an hriat tur te, Mission Shakti chungchang te leh khawtlang rorelna a thlantlin Hmeichhia te tana hriat tur leh an mawhphurhna te an zirtir bawk a ni.