AMC phalna nei lovin Aizawl Peak Resort sa niin sawi

Aam Aadmi Party (AAP) Mizoram chuan Aizawl Peak Resort, Zuangtui a mi chu Aizawl Municipal Corporation (AMC) atanga phalna nei lova sak a nih thu an sawi.

Kumin February ni 18 a Chief Minister Lalduhoma’n a hawn tak Aizawl Peak Resort chungchanga RTI-a chhanna an hmuh danin phalna neilo a sak a ni tih AAP chuan an sawi a, Aizawl Municipal area a AMC hriatpuina tello a sak a ni chu mak an tih thu sawiin, Skywalk neitu ZPM MLA ni a sawi awm chu hriatchian an chak thu an sawi bawk a ni.

AAP Mizoram Working President Lalngaihawma chuan Skywalk/Skybridge chu Mizoram tan leh Mizote tan tha hle mah se AMC huamchhung ami AMC hriatpuina leh endikna tello a sak a nih avangin a him tawk lo tih a sawi a. AAP Mizoram chuan Social Media-a hmuh anga balu bag 600 dahchhin hmanga a him tawk leh tawk loh enfiah a ni chu a tak a nih chuan Modern Technology tha ber hman a ni lo tihna a nih thu leh chhiatrupna thleng thei reng ni ah an ngaih thu an sawi bawk.

Skywalk chu Mizoram tan pawh a tangkai tak la ni zel tur a nih laia AMC hriattir lo leh phalna nei lo a siam a ni chu an hrethiam lo tih AAP chuan sawi bawkin AMC lam in hma an la la lo chu mak an tih thu an sawi bawk.