ZPM Party in Mizoram sum dinhmun in hma a sawn hret hret niin an sawi

ZPM Party chuan Kalphungthar mipui Sawrkarah Mizoram sum dinhmun in hma a sawn chho hret hret niin an sawi.

Nimin-a thuchhuah an siamah ZPM Media & Publicity Department chuan Mizoram sawrkar in Financial Year thar-a cheng vbc. 900 chuang kan luhpui thei tur chuan hma kan sawn tih a lantir nia tarlangin, “Nikum lam khan cheng vbc. 500 vel Financial Year hlui atang kan chhuahpui a, kumin FY tharah nikum lama kan luhpui cheng vbc. 500 aiin cheng vbc. 400 zeta tam kan luhpui thei hian kan sum dinhmun tha lo viau mahse, Finance Minister Pu Lalduhoma leh Pu TBC Lalvenchhunga, Adv to CM (Finance & Planning) changtu leh a thawhpuite zarah hmasawnna kan hmu chho ta hi ZPM party chuan lawmawm kan tiin, angaihna hria Finance Minister kan nei hi kan chhuang hle a ni,” an ti a. Kumin sawrkar kum a tawp rual hian pension charge lut sa zawng zawng pek fel vek hman a nih bakah GPF leh MR bill pawh a lut ang ang pek fel vek a ni chu ropui an tih thu an sawi bawk.

ZPM Party chuan leiba rulh kawngah pawh sawrkarin tan a la nasa hle tih sawiin, “ZPM kan sawrkar tirh, December 2023 leh January 2025 inkarah khan Medical Bill (MR Bill) cheng vbc. 90 zet rulh a lo ni tawh a. K-Deposit a sum tang cheng vbc. 653 zet pekchhuah a ni bawk,” tiin GPF cheng vbc. 782 pekchhuah a nih tawh thu an sawi bawk.