Zirtirtu lakah politics a inrawlh an phal lo tih Education Minister in a sawi

School Education Minister Dr. Vanlalthlana chuan Zirtirtu lakah politics a inrawlh an phal lo tih sawiin, “Tunhnaia Samagra Shiksha hnuaia zirtirtu lakah leh Casual Teacher lakah te pawh a thiam thiam lak an ni,” a ti.

Aizawl District Education Office buatsaihin Ningani khan Aizawl-a Govt Mizo High School Hall-ah Refresher Meeting neih a ni a, he hunah hian School Education Minister Dr. Vanlalthlana chuan sawrkar apiangin zirna siamthat nan an theihna leh thiamna an hmang zel tih sawiin, “Tun sawrkar pawh hian siamthat hna a thawk chho mek a, zirna hi a pawimawh avangin zirtirtu lakah hian politics a inrawlh hi kan hlau a, Zirtirtu lakah kher hi chuan politics a inrawlh hi kan phal lova, chumi hmang chuan zirna siamthat kan tum a ni,” a ti a. “Tunhnaia Samagra Shiksha hnuaia zirtirtu lakah leh Casual Teacher lakah te pawh a thiam thiam lak an ni,” a ti a ni. Education Minister chuan sawrkarin langtlangin hna a thawk mek tih pawh sawiin, vskmizoram.com-ah Zirtirtute attendance-te, Samagra Shiksha hnuaia hnathawh te pawh a duh apiang tan en theih a nih thu a sawi a, Pawl 3 leh pawl 6-ah random-in exam buatsaih a nih thu leh beisei aiin result a tha tih a sawi a, “NITI Aayog-in Best Practices-ah kan dah dawn an ti hial a ni,” a ti bawk.

Education Minister chuan Transfer & Posting Draft Rules chu hrual that mek a ni tih pawh sawiin, a duh apiang en theih turin chhawpchhuah a ni dawn tih a sawi a, Public Consultation siam a nih dawn thu leh ziaka rawtna thehlutte chu inrawnkhawmnaah hian koh an ni dawn tih a sawi a. Kutbeng rimawi chu kut pahnihin a siam a ni tih sawiin, “Hetiang chiah hian zirna ah rimawi siam turin lehlam atang ringawtin a siam theih lova, a tawn tawna tanrual a ngai a, Zirtirtute nena tanrualna atang chauhin sawrkarin zirna-ah rimawi a siam thei,” tiin zirna In-a thawkte chu tan la sauh sauh turin a sawm a. Zirna hmangin kan ram kan siam that a, kan hahchawlhna kan siam a ngai a tih sawiin, “Keiniho hian kan Syllabus leh kan zirlaite atangin kan hahchawlhna i sual chhuak ang u,” tiin kalkhawm te chu a sawm bawk.

He Refresher Meeting-ah hian Aizawl Municipal Corporation Area-a Govt, Deficit, Adhoc Aided leh Samagra school te atangin Headmaster leh Principal te an kalkhawm a. Primary School Headmaster 110, Middle school Headmaster 94, High School Headmaster 42, Higher Secondary School  Principal 19, an vaiin 265 an kalkhawm a ni.