Vawk lakluh khapna chhuah

African Swine Fever (ASF) hri leng avangin Serchhip District-a Vawk lakluh chungchang ah ah khapna thupek tihchhuah a ni.

Serchhip District Magistrate in tun thla ni 11-a hemi chungchanga thupek a tihchhuah ah Mizoram chhung District thenkhat heng Lunglei, Siaha, Lawngtlai leh Mamit-ah te Vawk hri, African Swine Fever (ASF) avangin vawk tam tak thi leh tawhin engemawzat suat an ni tawh tih tarlangin, Serchhip District chhunga kan ranvulh te an lo him zel theih nan thupek chhuah a tul thu a tarlang a. Section 163 of Bharatiya Nagarik Suraksha Sanhita, 2023 tlawhchhanin Serchhip District chhungah ramdang (Foreign countries) leh State dang atangin Vawk, Vawksa leh Vawksa atanga siam eitur reng reng lakluh khap tlat a ni tih tarlangin, Serchhip District chhung khua leh khua-a Vawk inlakpawh tur te reng rengin AH & Vety Department a thawk te emaw, khawtlang hruaitu Village Council te hnen atangin ran hrisel ngei anih hriatpuina an la ngei tur a ni tih a tarlang bawk.

Hei bakah hian Vawk hrisel tha chauh talh tur a nih thu leh Vawk damlo reng reng talh tura sawngbawl loh tur a nih thu pawh District Magistrate thupek-ah hian tarlan niin Vawk damlo leh thi reng reng chu AH & Vety. Department a thawktute hnenah hriattir vat tur a nih thu leh Vawk thi reng reng uluk takin Disinfectant nen thuk taka phumbo tur a ni tih a tarlang a. He thupek hi thla hnih (2) chhung huam tura chhuah niin thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang tih tarlan a ni bawk.