Kohhran hrang hrang ten Tumkau Ni an hmang

Kristian te ni pawimawh Jerusalem khawpuia Isua Krista lal anga a luhna ni hriatrengna, ‘Tumkau Ni’ chu nimin khan hmun hrang hrangah Kristian ten urhsun takin an hmang a, Mizoram-a Kohhran hrang hrangte pawhin he ni hi urhsun takin an hmang a ni.

Tumkau Ni (Palm Sunday) hi Isua Krista Kraws-a khenbeh hma Pathianni hnuhnung bera hman thin niin kumin ah chuan nimin, Pathianni khan hman a ni a, he ni pual hian Mizoram hmun hrang hrangah Kohhran hrang hrang te chuan zingkar-ah Tumkau chawi-a kawng zawhin khawlai an fang a, “Hosanna! Lalpa hminga lo kal chu fakin awm rawh se, Ram lo thleng tûr, kan pa Davida ram chu chawimawiin awm rawh se. Chungnung berah khian Hosanna!” tiin an au bakah Pathian fakna hla te an sa bawk.

Tumkau Ni pual hian Mizoram chhunga Kohhran hrang hrangte chuan Chawhma, Chawhnu leh Zan-ah inkhawm programme an duang a. Kohhran thenkhatah chuan Chawhma Sunday School neiin chawhnu leh zanah Tumkau ni pual in hun an hmang thung a. Kohhran thenkhat chuan Tumkau Ni pual hian thupui bik neiin hun an hmang bawk.