Tlawmngai pawl ten Union Home Secretary an kawm

Mizoram-a Tlawmngai pawl hrang hrangte chuan niminpiah tlai khan Union Home Secretary Govin Mohan hmu in Myanmar nena zalen taka ramri-a inkalpawhna tihtawp chungchang leh ramri hung chungchang an sawipui.

Ministry of Home Affairs North Block New Delhi-a thutkhawmah hian Union Home Secretary chuan, Mizoram leh Myanmar inkar hung tura hmalakna ah Mizoram tlawmngai pawl te thlawpna an beisei tih sawiin dodal lo hram turin a lo ngen a. NGO hruaitute chuan Free Movement Regime leh ramri hung chungchângah NGO Co-Ordination Committee anga ngaihdan awmsa sawiin, Home Secretary hnenah ram mipuite ngaihdan leh duhdan ngaipawimawh thiam turin an ngen a ni. 

NGO hruaitute chuan Union Home Minister Aizawl a alo zin laia a sawi, Airport Authority of India (AAI) kuta Lengpui Airport hlan chungchang hmalak tawh dan an zawt a. Mizoram a ruihhlo hluar lutuk chungchang leh Mizorama rampawn lam mi luh phalna Protected Area Regime chungchang te pawh an sawi a. Union Home Secretary chuan, Lengpui Airport chu Mizo mipuite duh dan anga AAI kuta hlan tura an lo sawi tawh angin, hma an lak mek thu a sawi a. Mizoram Chief Secretary chu proposal siam a a rang lama thehlut tura an hriattîr tawh thu a sawi a, an intiam tawh anga thla thum chhung ngeia hma an lak hman tur thu a sawi. Ruihhlo chungchâng ah Union Home Secretary chuan, Mizoram a ruihhlo hluar lutuk a vei thu leh, Mizo mipui ten nasa taka an do chu lawmawm a tih chu sawiin, sum leh pai leh hmanrua a tul apiang hemi kawnga hmalatute an puih tur thu a sawi a. Narcotics Control Bureau (NCB) kaltlanga an puih tur thu a sawi a. Protected Area Regime awlsam zawka lak a nih theih nan ruahmanna a lo siam nghal tur thu leh a enzui turin Intelligence Bureau Joint Secretary (NE) a ruat nghal bawk a ni.