Serchhip Fire Station-a thawktu ten Fire Service Day/Martyrs Day an hmang

Kumdanga-a lo hman tawh thin angin nimin April 14, 2025 atang khan ‘Fire Service Week’ chu India rampum-ah hman tan a ni a, Serchhip-ah pawh he Hapta hi hman niin nimin April 14 kha ‘Fire Service Day/Martyrs Day’ atan hman a ni a, kangthelhnaa leh Duty kaihhnawih a thi te sunna hun hman a ni bawk.

Fire Service Week hawnna leh Fire Service Day/Martyrs Day pual hian Serchhip-ah chuan nimin zing dar 9:00 khan Serchhip Fire Station-ah OC Ruatliana hovin hun hman a ni a, he hunah hian infuihtharna hun hmangin kangmei chhuak leh rikrum thil a lo thlena chhanchhuah leh chhawmdawlna hna an thawh thin ah rang taka chet chhuah thin a pawimawhna te leh an mawhphurhna hlenchhuak tura inring reng a awm a pawimawh thu te tarlan a ni a. Kangmei thelh a hna an thawhna thin ah pawh fimkhur tak chunga theihtawp chhuah thin a pawimawh thu te pawh tarlan niin hemi hnu hian kangthelhnaa leh duty kaihhnawih a thi te sunna hun hmangin Minute 1 (khat) ngawi renga dingin hun an hmang a. Hun an hman zawh hnuah Serchhip Bazar-ah he Hapta an hman tur pual hian Banner tar leh a ni a, tunkar ah inzirtirna hi kalpui chhunzawm zel tum a ni bawk.

April 14, 1944 khan Indo lawng lian 'S.S Fort Stikine' an tih chu Mumbai Lawng chawlhhmun-ah thlengin he Lawng, ralthuam leh bomb lam chi tam tak phur hi a kang vak a. He kangmei chhuak rapthlak takah hian kang thelhtu Bombay Fire Brigade mi 66 leh Bombay Salvage Corps mi 11 te chuan an nunna an chan a. Heng mitthi te hriatrengna atan hian Fire Service Day hi April 14-ah hian hman a ni a. April 14th-20th hi Fire Service Week atan niin India rama Fire Service hrang hrang te chuan kangmei laka himna tur zirtirna an nei thin a ni.

Serchhip Fire Station-ah hian Officer 2, Firefighter 4 leh Driver 2 awmin Fire Tender (Kangthelh Motor) pahnih an kawl mek a. Nikum (2024) April 1 atanga kumin March 31 thleng khan Fire Call tum 29 dawngin heng te hi House Fire 2, Forest Fire 25 leh Alkatra Fire leh Garbagel Fire tum khat ve ve te a ni a, heng te hi an thunun thei vek a ni.

Serchhip Fire Station hian kum kalta chhung khan zirna In, Damdawi In leh sawrkar Pisa hrang hrangah te kangmei ven chungchang inzirtrina an lo kalpui tawh a. Kangmei chhuak a be duh tan Ph. No. 8119884154/03838-222001 leh +91 3838-222135-ah tebiak theih reng an nih thu an sawi bawk a ni.