CSS hnuaia thawktu ten lungawi loh lantir dawn

All Mizoram CSS Employees Coordination Committee (AMCECC) chuan ruahmanna an lo siam tawh angin Vawiin atang hian lungawi lohna lantir an tum a, Serchhip-ah pawh lungawi lohna hi lantir tum a ni.
All Mizoram CSS Employees Coordination Committee (AMCECC) hian nimin khan thuchhuah siamin, sawrkar laka lungawi lohna lantirna atana Vawiin, April 15, 2025 atanga ni thum chhung Pen/Tool down strike neih an tum chungchangah nimin khan Mizoram Sawrkar aiawh Chief Secretary charge latu H Lalengmawia hova inbiakna an neih thu leh thulh tura an ngenna chu AMCECC Emergency Meeting chuan a ngaihtuah hnuah sawrkar lak atangin an thilphut tihhlawhtlinna tur engmah lungawipui tur thu an hmuh loh avangin April ni 15,16 leh 17, 2025 chhunga Pen/Tool down strike neih an tum chu kaltlangpui tur a ni tih an tarlang a ni.

AMCECC thuchhuah chuan, Mizoram Sawrkar aiawh CS Charge latu hoa inbiakna an neih mek laiin Mizoram Sawrkar chuan 'Enforcement of CSS (Conduct) Rules, 1964 and No Work No Pay, chungchang Office Memorandum (No. C.13015/4/2020-GAD Dt. 14th April, 2025) chu a chhuah hnan leh nghal nia tarlangin, “CSS hnuaia hnathawkte hnuaichhiahna leh vauna lian tak ni ah kan ngai,” an ti bawk.

All Mizoram CSS Employees Coordination Committee (AMCECC) in lungawi lohna lantir an tum hi Serchhip District-a CSS hnuaia thawkte pawhin an zawm dawn tih LENKAWL an hrilh a, Sawrkar Department hrang hrangah CSS-a thawk te hi an awm hlawm tih sawiin, a bikin Health Department leh Samagra Shiksha hnuaiah an tam nia thudawn a ni bawk.