Serchhip District-ah Zirlaibu semchhuak zo thawkhat

School Academic Session thar atan Samagra Shiksha Serchhip District chuan Zirlaite hnenah a thawh khatna atan Zirlaibu an semchhuak fel ta a, zirna In hrang hrang ten zirlai naupang an neih zat hriatchian theih a nih hnuah sem chhunzawm leh tur a ni ang.
Samagra Shiksha Serchhip District-a thawktute chuan kumin atan Zirlaibu sem hi a thawh khatna atan an zo thawkhat tih sawiin, nimin lam khan khaw pakhat chuan an la lak loh thu leh a dang zawng, District chhunga zirna In te tan pekchhuah a nih tawh thu an sawi a. Kumin atan School hrang hrang ten Zirlai naupang an neih dan tur hriat ala nih loh avangin April 7-a School luh tan a nih hnuah an indaihlohna te chu pekchhuah leh a nih tur thu an sawi a ni.

Zirlai naupangte hnena Zirlaibu a thlawna sem hi Primary School tan zirlai pakhat-ah Rs. 150/- man zel niin Middle School tan zirlai pakhat ah Rs. 250/- man zel ni tura ruahman a ni a. Pawl 1 leh pawl 2-ah zirlaibu pathum theuh semin pawl 3 leh pawl 4-ah zirlaibu 4 theuh sem tur a ni a. Pawl 5 zirlaite tan Zirlaibu 5 sem tura ruahman niin pawl 6 atanga pawl 8 thleng tan zirlai pakhat tan zirlaibu 10 zel semchhuah tura ruahman a ni bawk a. Zirlaibu hi Serchhip District chhunga Government Primary School leh Government Middle School bakah Government-Aided (Adhoc leh Deficit) School-ah te semchhuah a ni.

Samagra Shiksha Serchhip District-a thawktute chuan tunah hian Zirlaibu sem tur rawn thleng an semchhuah vek tawh lai hian la thleng lo pahnih khat erawh ala awm thu an sawi a, heng te pawh hi rawn thleng leh mai tura beisei a nih thu sawiin, Pawl tam zawk chuan an dawn tur ang ang an dawn kim tawh thu an sawi a ni.

Tarlan tawh angin Academic Session thar 2025-2026 atan tun thla, April 7 khian zirna In te hawn tan a ni dawn a, zirna In tam tak chuan Admission tihna hun hawng tawhin sawrkar School tam takah chuan School tan ni-ah an ti thung ang.