SCC enkawltute tan Serchhip-ah training buatsaih a ni

Nimin khan Serchhip DC Meeting Hall-ah District Agriculture Marketing Committee (DAMC) Serchhip buatsaihin Serchhip District chhunga Secondary Collection Centre (SCC) enkawltute tan training buatsaih a ni.
He Training buatsaih hi Bawrhsap leh DAMC Chairman Paul L. Khuma chuan hawngin he hun an buatsaih chhan te SCC enkawltute mawhphurhna tlangpui a sawi a, he huna tel te hi MAMB Co-opted Member - Lalnunpuia leh Isak Lalremruata te chuan zirtirna an pe a ni. Serchhip District chhungah hian thlai thar leina tur hmun, Secondary Collection Centre (SCC) pasarih a awm a. Heng SCC tinah hian a enkawltu tur Manager leh Coordinator te ruat vek an ni a. Sawrkarin Sawhthing hralh chungchangah a thawh hnihna a kalpui tan tawh dawn avangin training hi buat-saih a ni.

Sawhthing hralh thawh hnihna ah hian SCC tin te hi mahni kea ding thei tura beisei an ni tawh dawn a. Hei vang hian SCC enkawltu leh buaipuitute mawhphurhna leh tih tur a kimchang thei ang berin he hunah hian zirtir an ni.