Mizoram sawrkarin Consultant 4 nei mek

Mizoram sawrkar chuan Consultant pali nei mekin thla khatah cheng sing thum chuang vek an hlawh bakah zin bill siamsak an ni.

    Department of Personnel & Administrative Reforms record neih danin, Mizoram sawrkarin Consultant a neih te hi School Education Consultant atan Rev. Dr. K. Thanzauva; Land Revenue & Settlement Consultant atan C. Chalsawithanga, MSS (Rtd); Home Department-a CID (SB) Consultant-ah Malsawma Royte, DSP (Rtd) leh Public Works Department Consultant-ah Er. Lalsangliana Chhakchhuak, E-in-C (Rtd) an ni a. Education Consultant hian thla khatah Rs. 35,000/- a hlawh a, sawrkara Secretary dinhmun pek a ni. LR&S Consultant hian thla tin Rs. 32,000 hlawhin Joint Secretary dinhmun pek a ni a, CID(SB) Consultant hian thla tin Rs. 30,000 hlawhin sawrkar hna chelhlai dinhmun pek a ni lo thung a, PWD Consultant hian thla tin Rs. 34000 a hlawh a, Engineer-in-Chief dinhmun ang pek a ni. Heng Consultant te hi Official thilah State chhunga sawrkar phalna in an zin phalsak a ni bawk.