Mizoram Forensic Science Laboratory leh National Forensic Sciences University in MoU ziak

Tun thla ni 3 khan Directorate of Forensic Science Laboratory, Mizoram leh National Forensic Sciences University, Gujarat-te chuan thawhhona tur thuthlung, Memorandum of Understanding (MoU) an ziak.

He MoU-ah hian Director FSL T. Lalropuia leh Prof. Dr. Naveen Chaudhari, Campus Director ten NFSU, Gujarat te chuan an hming an ziak a, NFSU hi kum 2009-ah din niin October 2020-ah ram tana zirna In pawimawh dinhmun pek an nih bakah Central University-ah hlankai a ni a, India Sawrkarin Centre of Excellence-ah a puang tawh a ni. Mizoram Forensic Science Laboratory thawktute tarlan danin NFSU hi Forensic Sciences University hmasa ber niin thawhhona thuthlung hi International-ah 102 leh National-ah 147 a nei tawh a, chung zingah Mizoram Forensic Science Laboratory a tel ve hi Mizoram tan pawh hmasawnna rahbi pawimawh tak a ni.

He MoU-ah hian Mizoram Forensic Science Laboratory in kawng hrang hranga hma a sawn theihna tur duan niin, hmaraw la neih loh khawl tha mamawh angte an hmanpui thei ang a, Case exam theih lohte a tul angin thawn theih a ni bawk dawn a ni. Hei bakah hian Mizoram FSL a lo changtlun lehzual theihna turin Technical support, Joint Research Project, Infrastructural Development leh Special Training Programme te NFSU hian Mizoram FSL te mamawh angin a pe thin dawn a ni.