Gas Pipeline phum mek Minister in a enfiah

Ministry of Petroleum and Natural Gas bultuma Northeast Gas Grid Project hnuaia Panisagar (Tripura) atanga Sihmui inkara Gas Pipeline phum hna thawh mek chu nimin khan Supply Minister B. Lalchhanzova chuan a hmunah tlawhin a enfiah.

    He hna thawktu Indradhanush Gas Grid Limited (IGGL) hotute hian Supply Minister hi an hnathawhna hmun enpuiin hemi hnu hian Mamit DC Conference Hall-ah IGGL leh TNGCL hotute bakah FCS&CA Officials, Mamit DC leh a thawhpui te bakah khawtlang hruaigtute nen an inkawm a, he hunah hian TNGCL leh IGGL hotute chuan he project chungchang hi sawifiahin, he project hi km 127 a thui niin Mamit District-ah km 100 leh Aizawl District-ah km 4 niin a bak chu Tripura State chhungah a awm a. A project hi cheng vbc. 491 niin March 2026-a zawh hman tura duan a ni a. IGGL lamin Gas Pipeline an phum zawh ah Tripura Natural Gas Corporation Limited (TNGCL) in eirawngbawlna Natural Gas chu In lamah tui connection anga herhhaw theihin an sem dawn bakah Motor-a hman chi CNG chu Station engemaw zat ah pekchhuah turin an ruahman bawk anga. Minister chuan he project tihhlawhtlin hun a nghahhlelh thu a sawi a ni.