Kanghmun South leh Lunglei inkar kawngpui kum 4 chhunga siam zawh vek tum a ni

PWD Minister Vanlalhlana chuan Mizoram State Highway, Aizawl-Thenzawl-Lunglei (ATL) Road, Kanghmun South leh Lunglei inkar (100-164Kmp) kawng siam that hna chu sawrkar kum 4 (2024/25 – 2027/28) chhungin zawhfel vek tum a nih thu a sawi.

Mizoram chhim lama zin PWD Minister Vanlalhlana hian nimin khan Lunglei Press Club-ah thuthar thehdarhtute kawmin ATL kawng chu Mizoram-a kawngpui pawimawh ber pakhat a nih angin Mizoram sawrkarin a ngai pawimawh hle tih sawiin, World Bank-in ATL Road kawng a siam zawh hnuin Kanghmun South leh Lunglei inkar (100-164Kmp) thawmthat leh enkawl zui nan Mizoram sawrkar chuan kum 2017 - 2025 thlengin cheng vbc. 118.28 a pechhuak tawh tih a sawi a. Kum 2024 leh 2025 chhungin sawrkarin sum cheng vbc. 63.07 pechhuak tawhin, kum 2024 leh 2025 chhunga sum pekchhuah tawh zat hi kawng siamna atana pekchhuah tawh zawng zawng atangin 53.32% a tling phak tih a sawi a ni. PWD Minister chuan ATL Road hi siam a nih khan lirthei phurh rih zawng 1 msa (million standard axles) thleng dawl zo turin kawngpui chhah zawng hi 380mm-a chhaha siam a nih thu sawiin, kum 15 chuang a vei hnuin lirthei rit tak tak beisei aia tam a tlan tak avangin traffic count neih that a nih thu leh tunah chuan 4 msa dawl zo turin kawng chhuat chhah zawng pawh 485mm a nih a tul tawh thu a sawi bawk.

PWD Minister chuan kum 2024-2025 sum hmangin ATL Road Phase-I chu cheng vbc. 45.89 sengin siam tan a ni dawn tih sawiin, hna thawk turin SLT Infracon Pvt Ltd te thlan fel an nih tawh thu leh April ni 16 hmain agreement peih fel beisei a nih thu a sawi a. 138Kmp (Mausen) atanga 152Kmp (Pukpui thlen hma) thlenga siam turin ruahman phawt a nih thu leh hei hi Central Road Research Institute (CRRI) Delhi te’n a rang lama rawn enfiahin, an enfiahna azirin hei aia thui pawh siam theih beisei a ni, a ti a. Kumin Fur chhung hian kawng siam turin a huam loh chin zawng chu mipui an buai loh nan sawrkarin theihtawpin a veng reng dawn tih a sawi a. Bhagheeratha Engineering Ltd. (BEL) te security deposit leh a pung cheng vbc. 90.69 chu sawrkar sum bawm (consolidated fund)-a a luh hnuah sawrkarin kawngpui pawimawh leh ngaihmawhawm zual laite siam-that nan a ruahman tih a sawi bawk.