Huntiam chhungin Court building sa zo dawn lo

Kolasib Project Veng-a Fast Track Court building sak mek chu a sak zawh hun tur tum hnih pawhsei sak a ni chungin huntiam chhungin sak zawh hman a rinawm chuang loh nia thudawn a ni.

Kolasib-a Fast Track Court building sak mek hi kar kalta Zirtawpni khan Mizoram Journalist Association, Kolasib District member te chuan tlawhin PWD Project Sub-Division-a SDO Er. Calvin Lalhmachhuana chuan a lo dawngsawng a, Fast Track Court building hi Contractor chu Lalhnuna niin nikum September thla kha an sak zawh hun tur a nih laiin an zawh hman loh avangin kumin February thla thleng pawhsei a ni a. An la zawh theih loh avangin May thla thleng hi pawhsei sak leh tum mek a ni.

Er. Calvin-a chuan Building sakna tura sanction amount chu cneng nuai 2200 niin Agreement Amount chu cheng nuai 1375.75 a nih thu a sawi a, heng zingah hian nuai 900 tling lo deuh pek a ni tawh tih sawiin, tunah hian nuai 150 chu pek leh tura hmalak mek a nih thu a sawi a. “Sum lamah chuan harsatna kan nei lo. Court thuneitute lam pawhin sum an hmuh ang ang hi chu an rawn release nghal zel,” a ti a. Hetihlai hian hnathawktu lamah harsatna an nei tih sawiin, “Labour hi 100 aia tlem an awm kan remti lo a, mahse hei hi a taka kenkawh a harsa a. Mizo Mistiri leh Helper te pawh chhawr kan duh thin a, mahse chhawr tur an vang a ni,” a ti bawk.

Kolasib Fast Track Court building hi Mizopa chhiara chhawng 4 tur a ni a, building hi sak pum a ni tawh a, a chhunga pindan leh kawngkhar te, step leh lift-te zawhfel a la awm lo thung a ni.