Police ten pawikhawihtu man zingah thalai an tam

Mizoram Police te chuan September, 2023 leh December, 2024 inkar chhung khan pawikhawihna chungchangah mi 3,210 man an nei a, an mi man te zingah hian thalai kum 18 atanga kum 40 inkar an tam ber.

Mizoram Police tarlan danin September, 2023 leh December, 2024 inkara pawi-khawihna hrang hrang thubuai an ziahluh zingah rukruk thubuai an tam ber a, thubuai ziahluh zinga a za zela 42 zet a tling a. Thubuai ziahluh zinga zaa 16 chu Narcotic Drugs and Psychotropic Substances Act (NDPS) hnuaia ziahluh a ni a, Mizoram Liquor Prohibition (MLP) Act hnuaia thubuai ziahluh chu zaa 14 a tling bawk. 

Police-ten pawikhawihna hrang hrang thubuai an neiha an mi man 3,210 zinga zaa 80 (80%) zette chu thalai, kum 18 atanga kum 40 inkar an ni a. Thubuai siamsak zawng zawng zinga a zatve, za zela 50 chu kum 18 atanga kum 30 inkar an ni a, chung zingah chuan hmeichhia 12.7% an tel a, Mipa an tam hle a ni. Hemi hun chhunga Police-te man zawng zawng zinga 96%-te chu India khua leh tui an ni a, zaa pali chu Myanmar atanga kal an ni. Heng bakah hian Assam mi leh sa 158 man awmin chu chu zaa panga a tling a, Manipur mi 44 man an awm bawk a, Tripura mi 24 man an awm bawk.