FOCUS 2.0 atan District hrang hrang tlawh mek zel

International Fund for Agriculture Development (IFAD), Design Mission Team te chuan nimin khan Lawngtlai leh Hnahthial District te tlawhin Fostering Climate Resilient Farming System in the North-East (FOCUS 2.0) project kalpui dan turah District thuneitute an kawm.

Lawngtlai District-a FOCUS 2.0 kalpui tura inkawmna ah hian Line Department te nena thawhho dan tur te, ei leh bara intodelhna awm thei tura kuthnathawktute tanpui dan tur leh huapzo taka project kalpui tura ruahmanna siam ngai hrang hrangte sawiho a ni a. Thlai chin bakah Ranvulh lama hmalakna tur, Compact/Cluster Development kalpui dan tur te, thlai thar hralh kawnga hmalak dan tur bakah FOCUS 2.0 hlawhtling taka kalpui tura tihmakmawh kawng hrang hrang sawiho a ni bawk.

Hnahthial District-a inkawmna hunah hian FOCUS Project in kum 2018 -2024 chhunga District paruk (Mamit, Kolasib, Champhai, Serchhip, Khawzawl leh Saitual)-a an hmalak tawhna te bakah Integrated Farming System hlawhtling taka kalpui a nih dante a tarlan a ni a, tuna project thar, FOCUS 2.0 hnuaia hmalakna hi kum 6 chhung (2025-2026 atanga 2031-2032) atan Mizorama District zawng zawngah kalpui a nih dawn thu te tarlan a ni a. IFAD - Design Mission Team te hian Darzo Tea Processing Unit leh S. Vanlaiphai Upland Rice Production te tlawhin, Rotlang East progressive farmers te bakah Hnahthial Boar Semen Station, School of Agriculture Sciences leh KVK te an tlawh bawk a ni.