FMGE&W ten sawrkar hnathawk te MUHCS-a huamtir ve lo tura sawrkar nawr chhunzawm an rel

Mizoram-a sawrkar hnathawk inzawmkhawm, Federation of Mizoram Government Employees and Workers (FMGE&W) chuan Mizoram Universal Healthcare Scheme (MUHCS) chu sawrkar hnathawkte hi huam tir rih lo tura sawrkar nawr chhunzawm nise an ti.

FMGE&W hian nimin khan Aizawl-a Vanapa Hall-ah General Conference vawi 33-na hmangin Chawhnu lama Rorelna hun an hman ah Mizoram Universal Healthcare Scheme (MUHCS) chungchang hi an sawi khawm a, affiliated Association aiawhte pawhin an pawl ngaihdante an sawi hnuah FMGE&W General Conference chuan Special Assembly thuthlukna lo siam tawh chu nemnghetin, “MUHCS hi a system a la felfai tawk loh avangin sawrkar hnathawkte hi huam tir rih lo tura sawrkar nawr chhunzawm nise” tiin thu tihthluk a ni a. Hei bakah hian ‘Mizoram sawrkar hnuaia hna lak te hi public interest thlirin Department in an mamawh ang zelin rualkhai zawka lak ni rawh se’ tih te; ‘Central sawrkar hnathawkte DA pun ruala Mizoram sawrkar hnathawkte DA a pun ve zel theih nan hmalak zui zel ni rawh se; tih te; ‘Mizoram sawrkar-in a hnuaia thawkte tana Guidelines for framing of Service Rules/Recruitment Rules a siam a qualifying service ngai zat hi a pumpui a ennawn ni rawh se,’ tih leh ‘Mizoram sawrkar hnathawkte kan hnathawhna hmun theuh ah ram leh hnam tana thahnemngai tak leh neitu rilru pu chunga thawk zel turin in fuih thar ni rawh se’ tih te thu an thurel zingah a tel a ni.

FMGE&W General Conference-ah hian an pawl President Er. R. Lalrammawia chuan Mizoram sawrkar hnuaia thawk ten platform hrang hrang atanga beihna an tawk ta nual nia sawiin, “Hemi chungchangah hian keini sawrkar hnathawkte lam atang hian kan insawifiah ve ngai lem lova, mahse, tunlaia kan dinhmun thlirin sawrkar hnathawk ten Mizoram tana theihtawp chhuaha kan hnathawh thinte puanchhuah leh tarlan ve thin hi a ngai ve tawh niin a lang,” a ti a. Sawrkar hnathawk ten hamthatna an neih thin hrang hrangte pawh tunah chuan a awm tawh loh deuh vek thu sawiin Mizoram sawrkar hnathawk ten hamthatna an dawn ve chhunte zinga mi Medical Reimbursement (MA Rules 1944) pawh MUHCS-a thlak a lo nih tak thu a sawi bawk a ni.