Supply Secretary in e-KYC chungchang sawifiah

Food Civil Supplies and Consumer Affairs Secretary Teresy Vanlalhruaii chuan niminpiah khan a Pisa-ah thuthar thehdartute kawmin e-KYC chungchang a sawifiah.

    He hunah hian Supply Secretary chuan Supreme Court thupek angin National Food Security Act hnuaia Ration Card neite, Card Eng leh Card Pawl nei zawng zawngte tihchianna (e-KYC) chu India ram pumpuiah kalpui mek anih thu sawiin, Covid hripui avanga lamhla-a hnathawk te ration lak chungchanga harsatna an tawh nasat avanga PIL case kalzel in a rawn hrin chhuah a nih thu a sawi. Teressa-i chuan eKYC chu Fair Price Shop-a retailer te hnenah mahni Ration Card Number leh Aadhar Number hre chunga kala ePos ah kutzungpui va nem mai tur anih thu leh, India ram chhungah khawi retailer hnen atang pawhin Ration Card Number leh Aadhar Card Number hriat chuan kutzungpui nem hi a tih theih vek tih a sawi a. Retailer te chuan an hnena eKYC ti tura kal te an hnar a thianloh thu leh India ram pawn-a awm mek te erawh chu ram chhung-a an lo let hun hunah eKYC hi an ti ve mai dawn tih a sawi a, Naupang biometric data la lak sak theih ve lohte chungchang hi Ministry-in a ngaihtuah mek a ti bawk. EKYC hi Mizoram-ah chuan la ti lo a tam zawk an la nih avangin mipuite’n huntiam chhung, March ni 31 hmaa ti hman ngei turin mipuite a chah a ni.