Color Web Offset Press hawng

Mizoram State Planning Board Vice Chairman Dr. Kenneth Chawngliana hoin nimin khan Phunchawng-ah Color Web Offset Press hawn a ni.

Color Web Offset Press hawnna hun hi Panning Department Principal Advisor cum Additional Secretary Dr. Lalrinchhana chuan kaihruaiin MISTIC Principal Scientific Officer Samuel Lalmalsawma chuan an hmalak chhoh dan a tarlan bakah Mizoram Press Owners' Association (MPOA) aiawhin Lalthangvunga chuan Technical Report a pe bawk a ni.

He hunah hian Mizoram State Planning Board Vice Chairman Dr. Kenneth Chawngliana chuan, MPOA-in harsatna tinreng kaltlanga Color Web Offset Press Mizoram chhung ngeia an bun ta chu Mizoram tan lehkhabu leh thildang chhutna kawnga intodelhna kawnga Mellung pawimawh tak a nih thu a sawi a, hemi kawnga hma latu Mizoram Press Owners' Association hruaitute leh Mizoram Science, Technology & Innovation Council (MISTIC) hruaitute'n chawimawi an phu thu a sawi bawk.