Serchhip khawpui cheimawina Project hnuaia hmalakna kalpui turin hawn a ni
Serchhip District Beautification Project bultanna hunah hian Bialtu MLA leh Chief Minister Lalduhoma chuan UD&PA Department buatsaiha District Beautification Competition-ah Serchhip District in lawmman pathumna a dawng chu lawmawm a tih thu sawiin, he hmalakna hi Serchhip khawpui cheimawi tura hma kan lakna a nih bawk avangin a chhinchhiahtlak hle tih a sawi a. “He lawmman kan dawn theihna tura mawhphurtute zawng zawng chungah lawmthu ka sawi a. Ka lawmna tizualtu chu DC hova Department hrang hrangte, Town Planning Committee te, Florist Association te, NGOs te leh pawl hrang hrangten lungrual taka in thawhhona rah a ni hi a ni,” tiin Mizoram khua te chu mumal taka din a ni hlawm lo tih a sawi a. Amaherawh chu khawpui mawi leh changkang duhna a lian tial tial tih sawiin, “Chuvang chuan kan khawpuite hi mumal zawk leh mawi zawka kan siam thiam a tul hle a. Serchhip phei chu chutiang lama hmalakna tam tak hi a la kalpui theih a ni,” a ti a. “Nakin-a a than chhoh zelna tur mual te hi a lang reng a ni. Chung ram te chu mumal taka enkawl nise, lane kawng kalna tur te pawh tunah su su kan lai thei nghal lo a nih pawhin mumal takin lo duang sa ila, mipuite pawhin chu chu zah ila, kawng dik kan zawh tihna a ni mai,” a ti.
Chief Minister chuan chutianga khawpui hmasawnna tur chuan mi pahnih khat thahnemngaihna hmanga kal theih a nih loh thu leh mi zawng zawng huapa hmalak a tul thu sawiin, “Hmalakna tinrenga sawrkar sum beisei zel ringawt pawh hi a dik ber lova, beautification lamah phei chuan mitinin In leh a compound kan enkawl dan mai pawhin nghawng thui tak a nei thei a. Chutiang tih nachang hria khawtlang kha ni ila, thawk leh khatah kan hlawkpui lo a nih pawhin, kum hnih kum thum hnuah chuan kan hlawkpui ngei ngei ang. Serchhip khawpui hi chutiang lama change thlentirtu hmasa ah tang thei ila, midang hmaah han kal nalh mai ila, mi zawng zawngin min fak zui ang a, kan chenna khawpui a lo nuam hle bawk ang,” a ti.
Launching of Serchhip District Beautification Project hi Serchhip Addl. DC Lalrinzuala chuan kaihruaiin Serchhip Bawrhsap Paul L. Khuma chuan he hmalakna an kalpui dan leh khawpui mawi leh mumal zawk neih a tulzia te sawiin, an project duan a hlawhtlin huna Serchhip awm dan tur an hmathlirte a tarlang a. An hmalakna turah mipuite thawhpuina a ngen bawk a ni.
Mizoram sawrkar-a UD&PA Department chuan Mizoram-a Municipal awm lohna District khawpui te tan khawpui cheimawina atana Project siama inelna hi siamin Serchhip District hian lawmman pathumna a dawng a, a titha pathum te hi cheng nuai 50 theuh pek niin hemi hmang hian khawpui chei hna hi thawh tum a nih bakah Department leh pawl dangte nen tangtlangin sum hmuhna dang te ngaihtuahin hmalakna hi kalpui tum a ni.
Inrinni-a he hun hman ah hian Serchhip DC Office-a SDC Dr. Marilyn Lalruatkimi chuan intihsiakna an hmachhawn dan leh an project chung-chang a sawifiah a, an tum lian tham deuh te chu hmun hnih-a Park siam, kawngsira Palm Trees mumal taka phun-a khaw hmelhmang siam-that te, Bazar lun lai thawmthat te; Bench te, Wall Painting te, Fountain-te leh Signage mawi tak tak te daha ATM Water Vending Machine (Public Water Point) dah te, By-pass area-a Truck Bay siam te, mumal taka Zebra Crossing siam leh mipui rilru-a khaw chhung faina leh mawina tura mawhphurhna tuh (community participation) te a nih thu sawiin, Serchhip DUDO Gaston Vanlalhriatpuia chuan lawmthu sawiin hun a hmang bawk a ni.
Comments
Post a Comment