MUP Serchhip District Assembly vawi 14-na Bialtu MLA leh Chief Minister in a hmanpui

Mizoram Upa Pawl (MUP) Serchhip District chuan Inrinni khan General Assembly vawi 14-na hmangin Bialtu MLA leh Chief Minister Lalduhoma chuan he hun hi khuallian niin a hmanpui a ni.

Serchhip Sub-Hqrs. YMA Conference Hall-a MUP Serchhip District Conference-ah hian Chief Minister chuan Mizoram Upa Pawl lo indin chhoh dan sawiin, kum 1957 ah kum 50 chin zawng zawng lenna tur ‘Upa Lengkhawm Pawl’ din a nih thu te, kum 1961-ah ‘Zoram Upa Pawl’ tia thlakin kum 1982-ah tuna a hming lo ni ta, MUP ti-a thlak a nih thu te a sawi a. Ram-ah kum upa an tam a, mihring damrei an tam chuan chu ram chu ram tha leh changkang tihna tluk a nih thu sawiin, “Ram changkang leh changkang lo tehna pawimawh tak pakhat pawh Life Expectancy at Birth a ni. Human Development Index tehna hrui pawimawh tak a ni nghal bawk,” a ti a. Ruihhlo leh thildang vanga thalai boral an tam em em laia MUP member ni thei khawpa damrei an ni chu an vannei tih sawiin, “Upa te thil neih hlu em em mai chu an tawnhriat (experience) hi a ni. Kan pi leh pute pawh khan kum upa zawkte tawnhriat hi an ngaihlu a, engkimah upa zawk te an ngaichang hmasa zel thin. Chuvang chu a ni ang, Val Upa tih tawngkam te, Lal Upa tih tawngkam te hi kan neih phah ni,” a ti bawk.

Mizo ten ‘Tar a’ tih tawngkam kan neih thu Chief Minister chuan sawiin, “Kan rilru leh kan taksa enkawlna lama kan inthlahdah chuan kan lo mawlmang viau thei a. Amaherawh chu kan theih ang tawka kan inenkawl a, kan rilru leh taksa hriselna lam – lehkhabu chhiar te, chanchinbu chhiar te, Bible te pawh a ni ang, taima taka kan tih peih phawt chuan kan tar a chhan tur engmah awmin ka hre lo. Tumah i tar a lovang u,” tiin he huna kalkhawmte chu a chah a. Sawrkar in kum upa te a ngaihthah lo tih sawiin, “Kan sawrkar veleh khan Old Age pension kan tihpun tur thu kan puang a, State in a tum ve lam kan tisang ta dawrh mai a, Category tinah Rs. 1000 theuh kan pe ta a, Central tanpuina nen chuan Rs. 1200 vel an dawng ta a ni. Chu chuan kum lama upa zawk te sawrkarin a ngaihthah lohzia a tichiang awm e,” tiin hrisel taka awm a, rei tak dam turin duhsakna a hlan bawk a ni.

Mizoram Upa Pawl (MUP) Serchhip District Assembly hi an President T. Lalrawngbawla chuan kaihruaiin Report hrang hrang ngaihthlak a nih bakah an Member boral mi 288 te sunna hun hman a ni a. MUP Serchhip District hnuaiah hian Branch 66 awmin Area 10-ah an inthen a, Member 6202 awmin an zinga 2842 hi mipa niin a dang 3360 hi hmeichhia an ni a, kum 80 chunglam hi 876 an awm bakah Chief Patron 6, Patron 51, Life Member 303 an awm a ni.