Oil Depot hmun tur pahnih zirchiangin Gas Bottling Plant cheithat hna thawh mek a ni

Food Civil Supply & Consumer Affairs (FCSCA) Minister B Lalchhanzova chuan Indian Oil Corporation Ltd. (IOCL) te'n Oil Depot dinna tur atan hmun hnihah ram an zirchian dawn thu sawiin, Mualkhang Gas Bottling Plant cheithat hna thawh tan a nih tawh thu a sawi bawk.

Nimin-a Assembly inkhawm ah MNF Member K. Laldawngliana zawhna chhangin FCSCA Minister B. Lalchhanzova chuan, “Oil Depot siam tuma hmalak mek a ni a, Sairang Rail Station hnaiha siam tum a ni. A hmun tur hi IOCL-in an la thlan fel loh avangin khawilai nge, tu ram nge lak tum a nih sawi theih a la ni lo,” a ti. Supply Minister chuana an sawrkar hlimah Oil Depot chungchangah file a koh nghal thu sawiin, “Sawrkar hmasa hmalakna theihtawpin ka en ve a, chuta ka hmuhchhuah chu a ram tur thlan chungchangah a langtlang lo deuh em aw tih ka hmuh dan a ni,” a ti a, an sawrkar hnuah chuan langtlang takin a ram tur Advertisement hmanga an zawn thu a sawi bawk.

FCSCA Minister chuan Advertisment hmanga ram an zawnna chu mi 41 in an chhan thu pawh sawiin, “Ram 41 atangin ram pakua IOCL leh FCS&CA Department Team-in an endik a, chuta tang chuan IOCL lamin zirchian zui turin ram pahnih Sihhmui leh Mualkhang-ah an thlang,” a ti a. An hnu atang chuan thil a kal chak ta deuha a hriat thu sawiin, “January 16, 2024-ah Expression of Interest kan ko a, a chhangtute ram March 11, 2024-ah Joint Team-in kan enfiah a, chuta tanga thlanchhuah ram pakua July 14-ah enho leh niin, tunah pahnih an thleng chhuak leh,” a ti a, an beisei ang a nih chuan thla li velah IOCL-in ram an thlan fel tur thu a sawi bawk.

FCS&CA Minister chuan Mualkhang-a Gas Bottling Plant chungchang pawh sawiin, Gas Bottling Plant chu sawina a rei tawh tih a sawi a, “Prime Minister hawntir tum a nih thu sawi thawmte a awm. Kan sawrkar hnuah kan han chhui chiang a, chuti maia hawn theih a ni lo a. Sawrkar hmasa ram pek belh nia sawite Land Lease pawh a lo la fel lo a, a rang thei ang bera hma lain tunah chuan kan tifel tawh,” a ti a. An sawrkar hnuah hmalakna a kal chak thu sawiin, “A Gas dahna ber rintlak a nih tawh loh avangin khar a ni. A cheithatna atan cheng vbc. 225 sanction a ni a, chak taka hmalak a ni a. A hungna thawh mup mup a ni a, hnathawh hmuh theihin a awm. Rei vak lo ah Forest Clearance tihfel a ni ang,” a ti a, Mual-khang Gas Bottling Plant-ah theihtawp an chhuah thu a sawi bawk a ni.

Tripura atanga Gas pipeline lokal chu a Nodal Department ni chiah lo mah se, Chief Minister remtihna in Essential Commodities a nih tho avangin an ngaihven thu Supply Minister chuan sawiin, “Engineer-te pawh ka ko tawh a, hma an la chho mek zel,” a ti bawk.