Mizoram Budget a tlangpuia sawihona neih a ni

Chief Minister Lalduhoma chuan, kum khat chhunga leibat zat cheng vbc. 1000 chuanga tihhniam chu auhla mai ni lovin a tak a nih thu a sawi.

Nimin-a Mizoram Assembly thutkhawm ah a tlangpuia Budget sawihona neiin sawihona a khaikhawmna ah Finance changtu Chief Minister chuan, sawrkar kum thar tura leibat zat tur chu GSPD atanga chhutin 38.80% a ni dawn a, hei hi kum kal laia Revised Estimate aiin a sang hret a, a tak takah erawh chuan leibat zat chu cheng vbc. 1003.94 in kum khat chhungin an tihniam a ti a, eptu ten auhla mai mai nia an sawi chu auhla mai ni lovin a tak a nih thu a sawi a ni. Chief Minister chuan Hand Holding a sum dah a pun thu sawiin, hei hi thlai lei nana pawisa dah kalzel a ni a, thlai thar leina tur bakah CM Special package leh Loan Component te a huam dawn a, a tul dan azira dah bel zel tum a nih thu a sawi a ni.

Revenue deficit chungchang sawiin Chief Minister chuan, hlawh tihpun leh bill hrang hrang pekte leh hriat lawk loh chhiatna avanga sum indaihlohna avangin 'minus' zawngin a kal a, kum kal mekah Revenue deficit awm mahse, kum tharah erawh chuan cheng vbc. 562.90 in Revenue Surplus an nei leh nghal dawn tih a sawi bawk.

Chief Minister Lalduhoma chuan Universal Health Care Scheme chu thla thar April ni 1 atangin pawisa pek ngai lo chi, Cashless in kalpui a ni dawn tih sawiin, hemi atan hian sawrkar damdawi In zawng zawng tihchangtlun a ni dawn a, thawktu indaihlohna ah an mamawh zat zat lakbelh a ni dawn tih a sawi a, hei bakah hian Chief Minister chuan sem sawi rik a ni ta lo chu a lawmna a nih thu leh a taima apiangte tana duan Bana Kaih policy chu mitin tan a inhawng tih a sawi bawk.

Hetihlai hian Leader of Opposition Lalchhandama Ralte chuan, sum dinhmun siam that tum sawrkarin leibat zat vbc. 900 chuangin a tipung tih sawiin, sawrkar chu sum enkawl thiam ah a ngai thei lo tih a sawi thung a. Sawrkar chuan sum inremchen kumah a puan avang leh sawrkar in sum dinhmun siam that a tum viau avanga sawrkar leiba a hniam beisei a nih laiin, sawrkar leiba chu kum kal mekah cheng vbc 948.5 lai ah a pung chho nia sawiin, sawrkar kumthar a staworkar leiba tur chu vbc. 13,999 ni tura chhut a nih thu leh Revised a nih meuh chuan leiba chu cheng vbc. 2000 velin a pung dawn niin a sawi bawk.

Eptu Leader chuan kum kal meka leibat tura ruahman, Estimate leh a zat dik tak Revised tawh khaikhin luih tlat a ni chu lan mawi tumna mai nia a hriat thu pawh a sawi a, sawkar hmasa SEDP sum cheng vbc. 150 chu sawrkar tharin Bana Kaih hnuaia thlai thar lei nan cheng vbc. 110 a dah tih a sawi laiin, sawrkar sum ruahman Budget Head ah hmuh tur a van thu leh khawnge pawisa chu an dah tak tih chu a zawhna a nih thu a sawi bawk a ni.