School sak hnathawh tha lo chunga Completion Certificate sign an awm chuan sawrkar in a ko dawn

School Education Minister, Dr. Vanlalthlana chuan School sak hnathawh tha lo chunga Completion Certificate sign-tu Headmaster leh JE an awm a nih chuan sawrkarin a ko dawn tih sawiin, tunah pawh an kokhawm tawh tih a sawi bawk.

Nimin-a Mizoram Legislative Assembly thutkhawm a zawhna leh chhanna hunah INC Member C. Ngunlianchunga'n ‘Lawngtlai-a zirna In sak, tha tawk lo sak that leh dan a awm ang em?’ tih a zawhna chu School Education Minister Dr. Vanlalthlana chuan, hna tha lo a awm a nih chuan siam that tir leh a nih tur thu a sawi a, Minister chuan tunhmain Headmaster ten hnathawh zawh tawhna Completion Certificate an sign loh chuan transfer-a vau an tawh thin chu kalphung tharah chuan hna a tha lo chung chu sign miah lo turin Headmaster te chu thu an pe tawh zawk tih a sawi a, tun atang chuan hnathawktute chu VSKMizoram.com Dashboard system-ah kartin an hnathawh dan, a thlalak nen an update a ngaih tawh tur thu a hrilh a, ZPM sawrkar hnuaiah chuan hna pawh a tha tura ngaih a nih thu a sawi a ni.

School Education Department changtu Minister Dr. Vanlalthlana chuan sawrkar hmasa hunlaia dinhmun sang zawka sikul hlankai te chu an tlin tawkloh avangin tih danglam a nih thu leh kalpui zel dan tur zirchian mek a ni tih pawh Assembly House a hrilh a, Minister chuan sawrkar hmasa in khaw hrang hranga School a upgrade chu Middle School 48 leh High School 120 a ni tih sawiin, an tihdanglam chhan chu Provincialisation Rules dinglai dan leh dun thenkhat chu heng School hlan kai tak te hian an tlin tawkloh vang a nih thu leh kalpui zel dan tur chu uluk taka zirchian mek niin Council of Ministers thutkhawm huna putluh tura dah anih thu a sawi bawk.

Tun dinhmunah Samagra Shiksha hnuaiah School thar din belh tumna a awm rih lo tih pawh Minister chuan sawiin, tuna an neih sa thuamthat leh sak kal mek muang lutuk umzui lama insawrbing turin hma an la mek tih a sawi a, bungraw mamawh hrang hrang chu Restricted ni lovin Tender pangngai chhuah hmanga lei tur a nih thu leh tunhmaa School lehkhabu lei anih dan titawpin SCERT kaltlanga lei a ni tawh dawn tih a sawi bawk.

School Education Minister Dr. Vanlalthlana chuan Printed Price siamtha a, dik lo taka Football supply tum an manchhuah thu pawh House hi hrilhin, Sports equipment te an endik zel dawn tih a sawi a, Football supply tu an endikna-ah Football pakhat Printed Price-a Rs. 870 chu a tir lamah No. 1 thai belhin Rs. 1,870 in a dah thu leh chu chu Rs. 1,100 a supply a tum niin a sawi a. “He thil hi thil dik a nih loh avangin Office ah kan ko a, na takin kan hau a, Printed Price-ah a tla thla a ni,” a ti a, Sports equipment tha taka kalpui a ni tawh dawn tih sawiin, a tha thei ang ber School te pek tum an nih thu a sawi bawk.