Larsap in zirna chu exam hmachhawn nan mai ni lo, nundan tha leh dik zirna a nih thu a sawi

Mizoram Larsap General (Dr) Vijay Kumar Singh chuan ziak leh chhiar thiam leh mi taima tamna Mizoram in theihna nasa tak a nei tih sawiin, Zirna chu exam hmachhawn nan mai ni lo, nundan tha leh dik zirna a nih thu a sawi.

Larsap hian nimin khan lehlanga Siaha tlawhin Smart Classroom project hnuaia ITI Ltd. leh Implementing partner, Living Thoughts Organisation te'n Numaligarh Refinery Limited (NRL) te Corporate Social Responsibility (CSR) Fund kaltlanga an ruahman, Smart Board chu Siaha District chhunga Sikul thlanchhuah 6 te hman turin a hlan a, he hunah hian Larsap Vijay Kumar Singh chuan Smart Board neih theih nana CSR Fund thawhtu Numaligarh Refinery Limited bakah Smart Classroom siam theih nana buaipuitu ITI Ltd. leh Living Thoughts Organisation-te hmalakna fakawm a tih thu a sawi a, hamthatna dawngtu Sikul zawng zawngte thinlung taka a lawmpui thu a sawi bawk. Governor chuan Prime Minister-in India ram hmun kilkhawr ber bera awmte pawhin ramchhung hmun dangte ruala hmasawnna an hmuh ve zel theih nana hmalak a ngaihpawimawh thu leh hamthatna leh remchanna awmte pawh an neih zung zung theih nana tanlak a ngaihpawimawh thu sawiin, “Vawiina Smart Board sem pawh hi thingtlang kilkhawr zawk leh khawpuia cheng zirlaite hmasawnna kawnga intluktlanna tura ruahman a ni a, hei hian zirlaite hnenah zirna tha leh hlawhtlinna a pek ngei ka beisei a ni,” a ti.

Larsap Gen. (Dr) Vijay Kumar Singh chuan ziak leh chhiar thiam leh mi taima tamna Mizoram in theihna nasa tak a neih thu sawiin, hmalakna dik, hmanraw tha leh remchanna a awm phawt chuan tun ai hian nasa takin Mizoram in hma a sawn thei tih a sawi a. Mizoram sawrkar pawhin thingtlang kilkhawr zawka chengte hmasawn nan theihtawp a chhuah tih sawiin, Official-te chu thil thar leh tha zawk, hmasawn nana pawimawhte ngaihtuaha a hnena thlen hreh lo turin a sawm a. Zirna chu exam hmachhawn nan mai ni lo, nundan tha leh dik zirna a nih thu pawh sawiin, mipuite chu technology chhuak thar ber berte hlau mai lova hman tangkai tum zawk turin a chah a. Siaha District chu kimchang zawka tlawh leh ngei a tum thu a sawi bawk.

Siaha tlawhtu Larsap hi Siaha District Helipad-ah District Bawrhsap VL. Hruaizela Khiangte, DIG Southern Range Altaf Khan leh Official dangte'n an lo hmuak a. Circuit House tual-ah Guard of Honour pek a ni a, hemi hnu hian Smart Board semna leh inkawmhona chu Circuit House-ah hman zui a ni a. Bawrhsap V.L. Hruaizela Khiangte chuan he hun hi kaihruaiin inlawmna thu a sawi a. Living Thoughts Organisation aiawhin Prem Roy chuan report pein S. Lalremtluanga, Deputy. CEM, MADC in thu a sawi hnuah Vanlalchhuanliana, SDO (Sadar) in lawmthu sawiin hun hman a khar a. Hemi hnu hian Governor hian Sawrkar Department hotute leh hamthatna dawngtu Sikul zirtirtute a kawm zui bawk a ni.