Kum 2025-26 Mizoram Budget cheng vbc. 15198.76 chu Assembly House-ah pharh a ni

Finance Department changtu Chief Minister Lalduhoma chuan nimin khan kum 2025-2026 Mizoram Budget cheng vbc. 15198.76 chu Assembly House-ah a pharh a. Sawrkar in Handholding a kalpuina atan Budget-ah hian cheng vbc. 350 dah niin Power laina sum dah belh a ni bawk.

Mizoram Legislative Assembly thutkhawm nimin-a neih chhunzawmah Finance changtu Chief Minister Lalduhoma chuan sawrkar kumthar 2025-2026 a Mizoram Budget cheng vbc. 15198.76 chu a pharh a, Mizoram Budget thar hi kum hmasa 2024-2025 Budget cheng vbc. 14412.12 aiin cheng vbc. 786.64 in a tam zawk a, a punna hi 5.4% tlingin Budget Estimate 2024-2025 zinga cheng vbc. 13,835.42 chu House a pawm ngai a ni. Chief Minster in Budget pharh paha thu a sawi ah kum 2025-2026 atana sawrkar sum hmanna turah cheng vbc 12,540.20 ruahman niin, hei hi Budget pumpui atanga 82.51% a ni a, kum kal meka hman tura ruahman cheng vbc. 11957.04 aiin 4.88% in a sang zawk a ni. Sawrkarin hmasawnna rurel a din tur leh sawrkar leiba hniamna tura hman tur, Capital Expenditure atan cheng vbc. 2658.56 ruahman niin, hei hi Budget zawng zawng atangin 17.49% a tling a, kum kal meka ruahman cheng vbc 2455.08 aiin 8.29% in a tam zawk a. Sawrkar inrelbawlna senso, sawrkar hnathawk hlawh leh pension bakah hmasawnna thawhna tur atana sum hman tur ruahman (Revenue Expenditure) chu cheng vbc. 12,540.20 a ni a, Budget pumpui atanga chhutin za zela 82.51 a ni.

Chief Minister Lalduhoma chuan Viksit Bharat chu Mizoram in a tangkai thei ang bera hmang ve turin a inbuatsaih mek tih sawiin, kum 2024-25 Budget a pharh tuma sawrkarin sum leh pai enkawlna kawnga lei rem rap tura a inbuatsaihna atan, Year of Consolidation-a a lo puan in a nghawng chhuah hrang hrangte a sawi a, Pension benefit tangkhang an pekchhuah thute, Power leina sum bat tlak fel anih thute, Mizoram Health Care Scheme hnuaia Healthcare Bill ba tling khawm za zela 80 an pek tlak thu te a sawi bawk.

Sawrkarin an dinhmun dik tak aia sang GSDP figure an nei thin chu tha an ti lo tih Chief Minister chuan sawiin, tlahniam ta angin lan phah dawn mahse huaisen taka figure dik thei ang ber hmanga inteh a, nihna dik phochhuah an duh avangin kum 2024-25 GSDP cheng vbc. 48,037.52 chu vbc. 34003.27 ni zawk tura chhûtchhuah a ni ta tih a sawi a, a hniamna chu cheng vbc. 14034.25 a ni tih sawiin, figure dik zawk an hman tak avangin a inthlak tih a sawi a ni.

Kum 2025-26 atana sum hmanna tura ruahmanna langsar zual Chief Minister in a tarlan zingah Hand holding Scheme-ah cheng vbc. 350 dah a ni a, hei hi kum kal meka dah cheng vbc. 200 aiin 75% in a sang a, Power leina tur cheng vbc. 500 dahin kum kal meka dah aiin cheng vbc. 50 in a sang a, power infrastructure tih hmasawn nan cheng vbc. 20 dah a ni bawk.

Kawng siamna leh thuamthat nan cheng vbc. 100 dah niin Road Fund Board-a cheng vbc. 40 chu Road Maintenance Cess atanga an hmuh cheng vbc. 15 belhin a vaiin cheng vbc. 55 ah tihsan a ni a. Social infrastructure and Service Cess cheng vbc, 15 Finance-ah dah rih a ni a, Mizoram State Healthcare Scheme hnuaia bill awm te pek tlak zung zung a nih theih nan allocation an neih thin cheng vbc. 20 chu cheng vbc. 50-ah tihsan a ni bawk a. Ruang phurhna atan cheng vbc. 5 dah leh a nih bakah MLA Fund chu a ngaia kalpui tur a ni bawk ang.

Chief Minister hian kum kal mek 2024-25 Revised Estimate, Supplementary Demand cheng vbc. 3512.33 chu a pharh nghal a, Budget estimate pangngai baka Supplementary Demand lo awm thin chhan te pawh he hunah hian a tarlang nghal a ni.