'Indo Pacific GeoIntelligence Forum 2025 hawng

Mizoram Larsap General Vijay Kumar Singh chuan nimin khan Geospatial World buatsaih 'Indo Pacific GeoIntelligence Forum 2025' chu New Delhi-a Hotel Vivanta, Dwarka-ah a hawng.

'Indo Pacific GeoIntelligence Forum tum 15-na hawnna hunah hian Larsap chuan Indo Pacific Region chu khawvela sum leh pai than chakna hmun mai bakah ram venhimna kawnga hmun pawimawh tak a nih thu sawiin, Geospatial technology leh GeoIntelligence-te chu hemi ram huamchhunga awmte tana hmanraw tangkai tak a nih thu leh Geospatial Data-te rukchhuah a nih loh nana venhim a tul thu a sawi a. Indo Pacific region chu khawvel pum ang pawha insumdawntawnna hmun pawimawh tak, khawvel mipui zatve aia tam mah chenna leh ram leilung hausa tak a nih thu sawiin, boruak munawm leh ralmuang a awm zel theih nan thiamna sang zawk Next-generation GeoIntelligence hmanraw hrang hrang AI, Machine Learning, Special Computing leh a dangte chhawr tangkai a tul thu thu a sawi a. Indo Pacific Region-a awmte chu tun hun leh nakin zel thlenga boruak muanawm a awm theih nana ngaihtuahna senga helam hawia hma la tur leh thawkho turin a sawm a ni.

Indo Pacific GeoIntelligence Forum hi Defence lam kaihhnawih thiamna chi hrang hrang zir tura intawhkhawmna niin, chenna hmun a zirte, sik leh sa inthlak avangte emaw a buaina awm thei leh changkanna avanga danglamna thlengte zirho thin a ni. Kumin thupui atan 'NextGen Sovereign GeoIntelligence Assets for Regional Security' tih hman niin Vawiin hian chhunzawma zawhfel a ni ang.