Dan lova Mizorama bungraw lakluh tihtawp a nih theih dan tur sawiho

Nimin khan Commissioner of State Tax, Finance Department (Taxation) H.K. Lalhawngliana hovin Central Young Mizo Association (CYMA), Mizoram Merchant Association (MIMA), Mizoram Truck Owners Association (MTOA) leh Mizoram Chemist and Druggist Association (MC&DA) aiawhte chu a Office Chamber-ah inkawmin, Dan lova Mizoram-a bungraw lakluh tihtawp a nih theih dan tur an sawiho a. He inkawmhona ah hian H.K. Lalhawngliana, Commissioner of State Tax chuan chhiah lakna dan zawm lova State pawn atanga bungraw lakluh a awm tawh loh nan Mizoram Goods and Services Tax Act, 2017 and Rules hnuaiah khauh zawka enfiah a nih tawh dawn avanga mipuite hriattir lawk a tul thu a sawi a ni.

Mizoram Goods and Services Tax (MGST) danin a phut angin sumdawngte leh bungraw phur luttute’n State pawn atanga bungrua an lakluhin heng documents - e-waybill, GST Tax Invoice leh Bill of Supply (exempt-ah) te an nei ngei tur a nih thu Commissioner of State Tax hian a sawi a. Heng document-te leh an bungraw phurhte hi a dik ngei em tih enfiah nan Vairengte-ah Data Collection Centre din a ni a. Tun dinhmun ah hian dan zawm lova bungraw lalut an tam hle ni a hriat a ni a, hemi avang hian Mizoram State-in Chhiah a dawn tur ang a dawn loh phah thin tih a sawi bawk. Hei bakah hian Thawktu indaihlohna avangin Vairengte Data Collection Centre-ah duh ang thalin enfiahna hi kalpui theih a ni thin lo tih pawh sawiin, hetih rual hian theihtawpin hma an la a, April, 2025 atang chuan uluk leh khauh taka kalpui an tum tawh thu a sawi a. Hemi venpui tur hian NGO leh pawl hrang hrangte, Sumdawngte leh mipuite an tanho a tul hle tih sawiin; chhiah luangral tur ven kawngah sawrkar hmalakna tanrualpui-ah a sawm nghal bawk.