IOCL in Bus thar an pe

Indian Oil Corporation Limited te an CSR Fund atanga an lei TATA School Bus chu nimin khan Chief Minister Lalduhoma chuan Ephatha Special School for the Deaf & Hard of Hearing hnenah a hlan.

Seat 24 awmna he Bus thar hlanna hunah hian Chief Minister chuan  IOCL chu kumtin-a Mizoram sawrkara chhiah chhung tam ber pawl an nih thu leh kum khatah cheng vbc. 170 vel zet chhiah an chhunluh thin thu a sawi a. Covid lai khan Dialysis khawl 21 zet Mizoram sawrkar an pek thu leh Covid Bed engemawzat an rawn pe bawk thu a sawi a. Mualkhanga an Bottling Plant chu tilian mekin, he an hmalakna atan hian sawrkar pawhin ram zau tak an hawhtir thu leh Mizoramin Oil Depot tha kan mamawh avangin Depot an dinna tur hmunhma pahnih an kawhhmuh mek thu a sawi bawk a. Ephatha School tan Bus tha an pek bakah Spastic Society tan kumin ah Bus pahnih pek an tum bawk thu sawiin, lawmthu a sawi bawk a ni.

Bus inhlannaah hian IOCL atangin Z. Lhungdim, DGM (LPG-Engineering) cum State Level Coordinator for Mizoram, Kuldip Sarma, Senior Manager (Retail Sales) leh Malati Malakar, Senior Manager(HR-CSR) te an tel a. Bus registration senso tur chu Chief Minister hian a tum sak dawn a, Insurance bik erawh chu TATA Dealer Zothantluanga chuan a tum sak dawn a, Ephatha Society President Saihmingthangi chuan lawmthu a sawi bawk a ni.