ZPM hruaitu ten Serchhip-ah Campaign neiin VC thlengin Kalphung thar rilru pu an mamawh tih an sawi
ZPM General Hqrs. a Secretary General Er. Vanlalneiha Ralte leh Adviser Lalthazuala Rawite bakah an thawhpui te hian Serchhip Bial-a khaw hrang hrang tlawhin VC Inthlanpui neih tur atan an Campaign a, nimin khan Serchhip Veng hrang hranga an party hruaitute leh Candidate te nen inkawmin he hunah hian ZPM Secretary General Er. Vanlalneiha chuan ZPM Party chu ram hmangaihna leh veina thinlung tak tak pu a ram rawngbawl tura penchhuakte an ni tih sawiin, “Kumkhat lek sawrkarna kan han chelh chhung hian kan rinphak baka ram kalphung lo dik tawh lo, siamthat ngai kan hmu chho hnem ta hle mai. VC Level thlengin khawtlang hmasawnna tura Sawrkar hmalakna, a nih tur ang ni lo tam tak a awm,” tiin “Kan ram siam tha tak tak tur chuan LC/VC Level thlenga kalphungthar mipui sawrkar rilru pu mi khawtlang hruaitu kan mamawh a ni,” a ti.
ZPM Secretary General chuan, “Kan ram budget hi a nihna tur ang takin lo hmang thin ni ila chuan Vawiin hian raltiang ram kan kai ve tawh anga, ZPM Party ngei pawh hi a din a ngai lovang,” tiin “Kan ram siamtha tak tak tur chuan State Sawrkar atanga Village Council thlengin kalphung thar hi kan lo mamawh takzet tawh a, Kalphung thar policy hmanga kan khawtlang siam tha tur ZPM Party VC Candidate te hi Zoram mipuite hian min vote tlin sak ngei turin ka ngen che u a ni,” a ti.
ZPM Adviser leh MIFCO Chairman Lalthazuala Rawite pawhin Lalduhoma kaihhruai Kalphung thar mipui Sawrkar in ram siamthat a tum hle tih sawiin, “Ram rorelna a lo dik theih nan kan ram rorelna a Pathian ram tundin kan tum mek a ni. Chu mai ni lovin kan ram economic dinhmun siam that tumin hma kan la mek a, Ban-a kaih handholding (Scheme) hmangin kuthna-thawktute leh mahni kut ke hmanga eizawn tumte leh kalpui mek te khai chhuah kan tum mek a, chuvangin VC Level thlenga ZPM Policy tuipuitu VC kan mamawh ta hle a ni,” a ti a, MIFCO pawhin Lakhuithei, Sapthei leh Serthlum lei turin hma an la k mek thu leh Rawtuai leh Baibing te pawh a Tin-a siamchhuah an tum thu a sawi bawk.