Serchhip-ah MHSSP Walkathon 2025 nei dawn
Mizoram Health System Strengthening Project Walkathon 2025 hi Mizoram chhunga Health District 6-ah leh State Level-ah hman tura ruahmanna siam a ni a. He Walkathon-in a tum ber chu inkaidarh theih loh natna khirh tak tak - Diabetes, BP sang, Cancer, Thin/Kal/Lung tha lo leh a dang te laka inven dan inzirtir te, hriselna tura taksa insawizawi leh ei leh in fimkhur a tulzia inzirtir te a ni a. Ser-chhip-ah pawh March ni 4, Thawhlehni zing dar 7:00-ah Walkathon hi neih ni se tiin rel a ni.
Serchhip DC Meeting Hall-a hemi chung-chang ngaihtuaha thutkhawm ah hian Sr.CMO Dr. LP. Malsawma bakah Health Department Official te, sawrkar Official dang te leh tlawmngai pawl hrang hrang hruaitute an tel a. He kawngzawh hi hmun hnih atanga tan tur niin Group khat hi New Serchhip College Peng atangin an kal tan anga, Group pakhat hi Bazar atanga tanin Leisekawt Mual-ah an intawkkhawm dawn a ni. Kawng-zawh tur hian a tlem berah mi 700 beisei an ni a. Pawl hrang hrang MHIP leh YMA te bakah DIET, Govt. Serchhip College, School hrang hrang te, Sawrkar Office hrang hrangte leh mipui a tam thei ang ber he kawng zawhah hian tel tura sawm an ni.